Gaej yawj gou lij iq, gou doiq gak cungj yienhsiengq ndaw ndwenngoenz gig singj. Mwngz yawj, gou youh raen cungj yienhsiengq moq ndeu la!

Gou ceiq maij gwn raet- ndaem cauj gyaeqgaeq yiengh byaek neix. Yawj, gij gyaeqhenj dak hawj raetndaem rongh- sagsag, hawj vunz myaiz rih. Hoeng, moix baez cuengq raetndaem roengz cauq, de couh dauqcawq saetbyoeb- byoeb, sai haujlai, hawj gou sim’in liux. Vihmaz baenz yienghneix ne? Neix hawj gou gig geizheih, gou laemxsim yaek loengh cingcuj.

Liuxle, gou hwnj vangj bae ra yienzaen, laxlawz raetndaem dwg huq hawq, aeu cimq raemx gvaq cij ndaej gwn. Gij raet- ndaem deng cimq gvaq haenx dawz raemx daegbied lai, baez bungz daengz youzndat couh rox gawhbongz vaiqvwt, “bibi baba” seiqlengq luenh diuq. Yienzlaiz dwg yienghneix ha!

Yienghneix, baenzlawz cij ndaej sawj gij raetndaem mbouj caiq dauqcawq luenh diuq, an’onj dwk youq ndaw cauq ne? Gou gyaetuk gyaetngviz, siengj bae siengj dauq. Doeklaeng, aen siengjfap ndeu daj ndaw uk gou conh okdaeuj: Danghnaeuz dawz raetndaem caeuq raemxgyaeq doxgyaux gonq, caiq cuengq roengz cauq bae ceuj, ndaej mbouj ndaej suj gij raemx ndaw raetndaem, hawj de mbouj caiq seiqcawq luenh diuq ne?

Gou caenndang sawq mbat ndeu dahraix. Gou sien dawz gij raetndaem gaenq cimq ndei de ronq baenz sei cuengq haeuj ndaw vanj bae, doeklaeng dwk song aen gyaeq daengz ndaw vanj bae, aeu dawh gyaux yinz baenz raemxgyaeq. Caj youz ndat le, gou vaiqvet dawz gij raetndaem caeuq raemxgyaeq gyaux ndei neix dauj haeuj ndaw cauq bae. Yi? Caen saenzgeiz lo, baezneix gij raet- ndaem neix caen beij baez- naengz dingq vah lai lo, yienznaeuz lij miz gij sing caq “bibi baba”, cix caiq mbouj “bibi baba” dauqcawq luenh diuq lo. Gij gyaeq caeuq raetndaem cauj okdaeuj haenx mboujdan beij gaxgonq engq ndeigwn lo, lij gemjnoix saiyaix dem! Seizneix, gou dauqdaej dawz “diuz nanzdaez” neix buqgej lo. Raemxgyaeq sup gij raemx ndaw raetndaem dingz- lai, doengzseiz sup maenh raetndaem, miz ok le rengzgaz, hawj raetndaem “cak mbouj ndaej”. Laxlawz dwg yiengh- neix! Gou fwt rox daengz, gaej yawjsiuj banz byaek ndeu, gij gvai ndawde caen lai bw!

Gizgiz cungj miz gohyoz, saeh’iq miz dauhleix hung. Cijaeu youq ndaw ndwenngoenz guh boux miz sim ndeu, couh itdingh hag ndaej gvai.

(Vuz Yajsinh/raiz

Lij Lungzfangh/hoiz )