Sam bi gonq, gou cungj roxnyinh daxboh gig mbouj maij gou.

Aenvih de mbouj lumj daxboh ranz vunz yienghhaenx, caeuq lwgnyez guhcaemz guh’angq. Daxboh gou coengzlaiz mbouj daiq gou bae gunghyenz guhcaemz、 bae yawj denyingj gvaq, hix coengzlaiz mbouj caeuq gou dwk saek baez geiz gvaq, engq mbouj gangj youq mwh yaek ninz gangj goj hawj gou dingq lo.

Geiq ndaej miz baez ndeu, cuengqhag dauqma, gou cuengqroengz daehsaw le, siengj yawj densi yietnaiq yaep ndeu, hoeng gou ngamq naengh roengzdaeuj, gij sing lumj saeceij maenj haenx couh daj ndaw rugsaw daxboh cienz okdaeuj, coeg haeuj rwz gou:“Guh cozyez gonq! Guh saehcingz mbouj rox baen gonqlaeng naek- mbaeu ha?” Gou lau dwk ndang yaek unq liux, song ga cix saenzdedded, fwngz baez saenz, aen yauzgunggi doek roengz gwnz dieg bae, ca di soiq lo. Gou hoizsaenz gvaqdaeuj le, cij rag daehsaw coh haeuj ndaw rug bae. Gou daj gehdou yawj ndaw rug daxboh bae, yawjraen daxboh naengh youq henz daizsaw, najbyak nyaeuqnyaeuq, fwngz sij saw mbouj dingz, gou naemj de daihgaiq youh dwg bang hagseng de gaij lunvwnz ba. Seizneix, daxboh nyeux gyaeuj dauq, daj gehdou yawjraen gou lij ngaizngednded, hat naeuz:“Lij mbouj vaiq di!” Gou lienzmuengz buet haeuj rug bae, lau youh deng ndaq. Ai, caen dwg boux vunzyak ha, ndaw sim gou ienq daxboh dangqmaz.

Hoeng, siengj mbouj daengz, daxboh yakrwix gou hix miz mwh unqswnh. 10 nyied 8 hauh ngoenz haenx, dwg ngoenzseng gou, ngamq dwg bungz ngoenz couhmoz, gou naemj, baezneix daxboh wnggai miz hoengq caeuq daxmeh caez buenx gou bae yawj ciengz denyingj ndeu hoh ngoenzseng gou. Gou sim’angq dwk haet romhri couh hwnqcongz, hoeng, cix mbouj raen daxboh youq ndaw ranz. Cam daxmeh, cij rox de ngoenz- neix youh bae camgya aen hoih dapbuek yenzgiuswngh bizyez lo. Gou yienznaeuz miz di nyapsaeb mbouj angq, hoeng yaep ndeu hix couh siuheiq, suenq lo, hozbiet caeuq boux “dawzgienz hung” ndaw ranz neix suenq gaen suenq liengx, fanjcingq de hix mbouj maij gou. Gyanghaemh, gou lumj baeznaengz ityiengh, caeuxcaeux couh bae ninz lo, hoeng ninz youq gwnz congz, mbouj rox vihmaz cungj ninz mbouj ndaek. Sawqmwh, aen dourug gou hai lo, daxboh byaij haeujdaeuj, soh naengh youq henz ndang gou, gou daegdaengq cienq gvaq gyaeuj bae, mbouj siengj hawj de yawjraen naj gou. Daxboh sing unq- swnh naeuz:“Lwg ha, daxboh siengj caeuq mwngz gangj, daxboh doiq mbouj hwnj mwngz, ngoenzneix dwg ngoenzseng mwngz, daxboh cix mbouj ndaejvangq buenx mwngz……”Dingq daengz gij vah daxboh, gou caen miz di moenghmangh lo. Gou ndaejgeiq, daxboh coengzlaiz mbouj riu coh gou gvaq, baezneix baenzlawz caeuq daeglwg de gangjvah baenzneix unq- swnh ne? Seizneix, ndaw sim gou roxnyinh soemj van haemz manh, gij raemxda utheiq haenx nyaenx mbouj ndaej lae’byoegbyoeg, aen swiz gou deng mbaeq liux. Gou caegcaeg yawj daxboh, yawjraen ndaw lwgda daxboh hix miz raemxda myigmyagmyag. Seizneix, gou dauqdaej rox lo, gizsaed, youq ndaw sim daxboh soqlaiz cungj miz gou.

Gizsaed, daxboh seizseiz cungj gyaez dou. De mbouj lumj daxmeh yienghhaenx gij gyaez cigsoh youh ndatfwd, de lumj cenj gahfeih gya dangz ndeu, cijmiz youq mwh yungh- sim menhmenh cimz, mwngz cij gamjsouh daengz gij feih van yo youq ndaw cingzeiq laegna haenx, hawj vunz hoizfeih nanzlumz.

(Yangz Swhyenz/raiz Veiz Yennaz/hoiz)