Haemh singhgiz haj, daxmeh haemq gou:“Mwngz haetcog bae riengz gou baijdan roxnaeuz gag youq ranz ninz?” Gou ndaejnyi couh miz le cingsaenz:“Gou caeuq mwngz bae baijdan!”

Haet daihngeih seiq diemj lai, mbwn ngamqngamq rongh, gou lij ninzndaek, daxmeh couh daeuj heuh gou hwnq. Gou bietlied hwnqcongz, yienzhaeuh catheuj swiqnaj liux le, couh caeuq daxmeh caemh bae daengz bakdou hagdangz baijdan. Yawjraen daxmeh daeuj lo, haujlai go cej homh hwnjdaeuj baizdoih, daxmeh yaep da couh nyaengq- lulu.

Lwnz daengz dah cej ndeu, de diemj le vanj mienh ndeu, yienz- haeuh hawj aen liengj ndeu caeuq daeh makbingzgoj ndeu hawj dax- meh. Yienzlaiz, haetlwenz fwn- doek, liengj de vaih lo, dwg daxmeh ciq aen liengj dog ndanggaeuq hawj de. Yawjraen de yienh makbingzgoj daeuj, daxmeh doiswz naeuz:“Mwngz boiz liengj hawj gou couh ndaej lo, mbouj yungh mbaiq lai!” Dahcej hoiz naeuz: “Nax, ngoenzlwenz gyo mwngz ciq liengj hawj gou yungh, mboujnex gou couh dwgliengz lo. Gij neix dwg sim’eiq gou, mwngz sou ba!” Gangj liux, de couh buet haeuj hagdangz bae. Gou hai daeh mak- bingzgoj, fatyienh baihndaw lij miz mbaw sa ndeu, baihgwnz sij: Gyo- mbaiq nax ngoenzlwenz ciq liengj hawj gou, hoh mwngz seng’eiq fat fat fat fat fat! Gou yawj le, sim’angq riu lo, gou roxnyinh miznaj dangqmaz, aenvih gou miz boux meh gaenxguh、simndei baenzneix.

Ginggvaq haet neix, gou mingz- beg le daxmeh guh seng’eiq iq geijlai sinhoj, daxmeh ra cienz geijlai mbouj yungzheih. Gou yaek ndeindei doegsaw, baenaj majhung, gou itdingh ndeindei hauqswnh daxmeh, lumj gofaex hung seizseiz bang daxmeh dangj rumz dangj fwn. Yienznaeuz gou dwg lwgsai, mbouj rox guhlumj buhdungh nei raeuj ndang meh, hoeng gou ndaej guh aen daengngoenz iq ndeu raeuj de.

Gou lumz mbouj ndaej aen haetromh nyaengqfoedfoed hoeng raeujrubrub neix, gou maij daxmeh gaenxguh、simndei、simgvangq gou.

(Cinz Ginjgiz/raiz Lij Yanghlenz/hoiz)