Daxboh gou gij byoemgyaeuj de youh ndaem youh ndongq, doiq bwnda de youh noengz youh co, song ceh da de yawj bae lumj gij raemxmboq laeg mbouj raen daej nei. De doiq gou yiemz dangqmaz, youq ndaw sim gou, de youq ranz doiq gou yak lumj duzguk nei.

Daxboh doiq gou yiemz raixcaix. Ndaejgeiq miz mbat ndeu, aenvih gou youq ndaw hag mbouj souj gijliz, deng mbaet bae ceh ndaundeiq ndeu, bonjlaiz gou cungj mbouj dawz haeuj sim saekdi, ngamq ceh ndaundeiq ndeu ma, mbouj miz gaiqmaz youqgaenj! Hoeng lajmbwn mbouj miz ciengz ndaej red liux, gienh saeh neix daxboh gou yaepyet couh rox lo, de doq fok gou, hoeng gou ni? Mbouj dawz haeuj rwz saekdi, cij deng mbaet ceh ndaundeiq ndeu, guhlumj gou yoek mbwn doemq nei. Daxboh raen gou cungj mbouj najhoengz, hozfod dangqmaz, huj dwk naj ndaem liux, singhung hat gou: “Bingzseiz hawj mwngz guenj bonjfaenh ndei mwngz guh mbouj daengz, banneix naeuz mwngz mwngz lij mbouj fug dem!” Gou ngaem gyaeuj mbouj gamj ngonz cehda daxboh, bande cehda de yawj hwnjdaeuj lumj naq raeh, yawj gou yak lumjmaz, gou lumj deng cehda de mbongq ok song ngauq congh nei. Gou lau dwk siengj doenqdauq liz de gyae di, ndawsim gou lumj miz cibhaj aen doengj rap raemx——caet hwnj bet roengz. Gou mbouj rox yaek baenzlawz guh, ienq dangqmaz. Gou ngamq siengj haibak naeuz gou rox loek lo, daxboh ngeiznaeuz gou yaek dingjbak, de engqgya gaek lo, gij sing de hung lumj guk rongx nei fok naeuz: “Mwngz lij baknyangq dem, mwngz yawj gou hauhlawz fad mwngz!” Hwk dwk gou gyan coenz vah dauqbae, mwh de, raemxda gou lumj ceh caw nei daj gwnz naj rih roengzdaeuj. Caen ngvanh mbouj daengz, daxboh caenhnaeuz mbouj suenq sang hung, hoeng de heiqciengz hungloet, ndaej hawj gou lau dwk mbouj gamj gangjvah.

Daxboh doiq gou iugouz yiemz mboujdanh dwg youq fuengmienh doegsaw, youq bingzseiz gwndaenj doiq gou iugouz caemh yiemz. Beij- gangj mwh gwn haeux gou dwk haeux doek youq gwnz daiz, de couh damz bae damz dauq. Bae diengzhaex nanz di, de couh yunghrengz mboengj dou, coi gou gaenj di, heuh daengz gou okdaeuj cij sat. De cungjdwg lumj gaem aen gingq- cuengqhung nei daeuj ra gij loek gwnz ndang gou, gou hix mbouj gamj fanjbuek de, mboujnex, saekngoenz “goengq bya feiz” neix youh boed lo, couh dwg cainanh hwnjndang lo.

Daxboh gou couh dwg yienghneix la, de lumj duzguk ndeu nei, yienznaeuz de doiq gou yiemz, hoeng gou lij gyaez de raixcaix, gou ciengxlwenx gyaez daxboh gou.

(Bungz Swngboz/sij Veiz Munglingz/hoiz)