Daxbuz gou roekcib lai bi. De noh ndaemndwtndwt, song faj fwngz de cocadcad hwnj daw rim liux, baez yawj couh rox dwg boux gaenx guhhong youqndwi mbouj ndaej.

Daxbuz daj haet nyaengq daengz haemh, mbouj hoengq saek yaep. Ngoenz singhgiz haetromh, gou lij fangzhwnz loq, couh dingqnyi ranz- saeuq miz sing yiengjcaca, mbouj yaepndeu gij rang cen nohvaiz couh biu haeuj rug daeuj, laxlawz daxbuz gaenq hwnq lo, caeuxcaeux bang dou cawj ngaiz ne.

Cawj ngaiz baenz le, daxbuz youh sikhaek gwih dendungceh, muengzhoebhoeb bae reih. Yawj, de gungj hwet, gingz gvak, hwnjhwnj roengzroengz yaengx faggvak, mbouj yaepndeu, gaiq reih hung haenx couh gvak sat lo. Gvak reih sat daxbuz hix mbouj daengx. De nyaeuq nakbyak, song fwngz aemq laeng hwet, byaij bae byaij dauq, baenq dwk hawj gou dava. Sawqmwh, daxbuz lumj siengj daengz gijmaz, cienqndang couh byaij, gou muengz gyaep hwnjbae cam naeuz:“Daxbuz, mwngz youh fatyienh gijmaz moq?”Daxbuz riu naeuz:“Daeggunh, mwngz youq neix nw, gou baema ranz doz haexyiengz daeuj dwk gaiq reih ngamq gvak neix, vanq ceh ndaem byaekheu, yienghneix mwngz couh miz byaek moqsien gwn lo.” Gangj sat, de angqfwngfwng gwih dendungceh baefafa mbouj raen rieng lo.

Gaej nyinhnaeuz daxbuz ndaem byaekheu gvaq le couh ndaej hoengq lo. Ne, de youh bae ndaw cangj daxgoeng bangfwngz guhhong lo. De yaepndeu dawz sauqbaet baet dieg, yaepndeu dawz gisongi ciuq feisoengqhuq doiq soq, nyaengq- foedfoed couh lumj duzrwi gaenx guhhong ndeu, cungj mbouj rox baegnaiq.

Neix couhdwg daxbuz youqndwi mbouj ndaej gou, gou gyaez de dangqmaz.

(Luz Yigunh /sij)