Ngoenz singhgiz sam ban- ringzgvaq, yijvwnz lauxsae Cinz lauxsae heuh dou cau cauhgauj faenzcieng hwnj gwnz bouhcozvwnz bae.

Gyoengq doengzhag cungj roengzsim causij, gou raen baezneix gij cihsoq bien faenzcieng gou lai gvaq doengzhag, couh siengj：Danghnaeuz daengjneix raiz roengzbae, mwh roengzdangz gou couh mbouj miz seizgan ndij doengzhag guhcaemz lo. Yienghneix gou sawqmwh naemj daengz：Daengx ban baenzlai bien faenz- cieng, lauxsae mbouj aiq ndaejgeiq dangq boux hagseng raiz le geijlai cihsaw, gou moix duenh noix raiz itndeu, engqlij noix raiz duenh ndeu, yienghneix roengzdangz le couh ndaej ndij doengzhag guh- caemz lo. Siengj guh doq guh, gou yaepcan couh raiz liux gyau hwnjbae lo, lij angqfaengz haenh lajndang gvai raixcaix dem.

Mwh yaek cuengqhag, Cinz lauxsae najnyaeuq byaij coh gou. Gou doq sim diuq uk siengj, gou raiz cozyez loek la? Gou roengzdangz youq coujlangz buet le ngaiz doengzhag bauq lauxsae? Gou noix raiz neiyungz faenzcieng ngaiz lauxsae rox la?

Gou cingq laebluenh siengj, Cinz lauxsae byaij daengz dangqnaj gou, yawj coh gou naeuz：“Mwngz ndaej dap aen vwndiz gou lwi? Moix faenh cozyez raeuz guh, couh lumj moix aen ranz bouxdaengjranz hwnj nei, danghnaeuz gemj goeng gemj liuh, aen ranz neix yaek baenzlawz yiengh ne?” Gou doq dingq doq naj ndat lumj feiz, aen sim diuqbubbub.

Ai, ngaiz lauxsae rox dahraix lo, gou ud’ab gangj naeuz：“Aen ranz haenx mbouj habgek……mbouj maenhnet……mbouj ndaej hawj vunz youq.” Cinz lauxsae ngaekngaek gyaeuj, youh cam：“Danghnaeuz mwngz dwg boux gamleix aen gunghcwngz neix, mwngz aj gangj gijmaz hawj bouxdaengjranz ne?” Gou naj- hoengz lo, mizdi remjnaj ha, najnyed naeuz：“Gou yaek hawj bouxdaengjranz cek aen ranz neix, ciuq biucinj bae hwnj moq.” Cinz lauxsae mbouj caiq gangjvah, dawz bonj bouhcozvwnz gou menhmenh coq youq gwnz daiz gou, cienq ndang bae lo. Dinghdingh muengh lauxsae byaij bae, gou gyaengj lo……

Gou launaeuz “saeh laeuh” lo, Cinz lauxsae yaek fokdengdeng, siengj mbouj daengz de yienghneix son gou.

Gou fan hai bonj bouhcozvwnz, dawz bit roengzsim cau moq, couh lumj bouxdaengjranz ciuq mbawdoz roengzsim roengzrengz hwnj ranz nei……

(Sinj Sihyin/sij Lij Lungz- fangh/hoiz)