Bohmeh ngeix doegdawz（hwnj;daengz）,

Doegsaw ndaej ciengx mingh,

Haeuj ndawhag bae dingq,

Lingx ndaej cih suenq cih.

-

Gou bae cam lauxsae,

Yienghlaez(lawz) haeuj yozyau,

Lauxsae daengq coenz hauq,

Naeuz mbouj lauq cix baenz.

-

Cam ndei goeng lauxsae,

Gou ndaej bae yozyau,

Dawz mingz gou bae bauq,

Lauxsae riuhoho.

-

Gou lwgda mbouj raeh,

Sim hix maeh doegsaw,

Gou yienghyiengh geiq dawz,

Doegsaw ndei sawj yungh.

-

Ngeix daengz sim gag angq,

Ndaej naengh daiz doegsaw,

Cog bae mbanj bae haw,

Rox cih saw fuengbienh.

-

Gou haeujsim bae dingq,

Gou buekmingh bae gaen,

Gaujsi mbouj ndaej faen,

Sim hix saengz hix meih.

-

Mbouj rox gaem bit sej(raiz),

Gou bae deq geiq rumz,

Aeu ukgyaeuj guh hung,

Geiq rumz hix mbouj loek.

-

Mbouj rox gaem bit sej,

Mbouj rox veh yienghlawz,

Daengz ngoenzcog ngoenzrawz,

Dawz bae cam doengzhag.

-

Gyoengq doengzhag hix ndei,

Miz maz saeh doxcoengh(bang),

Miz maz gwn doxsoengq,

Mbouj ce hoengq saekngoenz.

-

Gyoengq doengzhag hix ndei,

Goeng lauxsae hix rox,

Yienghyiengh de ciuqgoq,

Lumj bouxboh gyang ranz.

-

Daj gou ndaej haeujhag,

Sim gag angq lailai,

Gaxgonq naemj daengz dai,

Neix simhai gvaqdoih.

-

Daj gou haeuj hagdangz,

Fangzhwnz hix daeuj hag,

Sai riu venj naj bak,

Haeujhag caen vuenyungz.

-

Beixnuengx hix sinhoj,

Ngoenzngoenz cungj daiq bae,

Guhdoih naengh doegsae(saw),

Doengzcaez daeuj guh’angq.

-

Ngeix daengz daeg nuengxsai,

Aen sim de lai soh,

Mboujlau maz sinhoj,

Goq raeuz ngoenz doek ngoenz.

-

Ngeix daengz dah nuengxmbwk,

Hix dwg heuh vunz gyaez,

Daiq dauq youh daiq bae,

Ngoenz vaij seiq haj doh.

-

Gyoengq nuengx gou mbouj ca,

Daiq hwnj bya gvaq loh.

Miz boux raen gou yoq(yak),

Doxbungz hix mbouj cim.

-

Beixnuengx daiq gvaq loh,

Goj mbouj lau vunz cim,

Raeuz beixnuengx doengzsim,

Cing(yien) bae caiq cing dauq.

-

Caih vunz cim cix cim,

Raeuz cing bae cing dauq,

Doengzdoih bae yozyau,

Mbouj caux saeh cix baenz.

-

Caih vunz lwnh cix lwnh,

Hwnjroengz raeuz doxgaen,

Guhdoih hag sawfaenz,

Muengh miz ngoenz baenz yungh.

-

Haeujhag ndaej dingq goj,

Hix hag rox ndaej saw,

Gaiqgaiq hag ndaej dawz,

Bae haw rox suenqsoq.(6)