Gou daeuj ndaw singz gunghcoz mbouj geij nanz, couh ciep ndaej gij dienhvah ranzcoj lajmbanj, naeuz dwg daxboh fwt baenz binghnaek, heuh gou vaiq di ma ranzcoj.

Gou ganjgip ma daengz ranz. Daxmeh raemxda doek- byoegbyoeg naeuz gou nyi, daxboh ngoenzlwenz lij bae guh hong, banhaemh daengz ranz, sawqmwh gangj mbouj ok vah, song ga unqet bienq vaih liux, ngunhmaez mbouj singj. Daxmeh simnyap dwk doiq gou naeuz: “Dahlwg ha, gienh saeh neix baenzlawz guh?”

Gou doiq daxmeh naeuz: “Soengq daxboh bae yihyen ndawsingz yawjyawj. ”

Dou soengq boh bae yihyen ndawsingz. Canghyw bang daxboh genjcaz le, doiq dou naeuz: “Aeu sikhaek guh soujsuz”. Canghyw guh soujsuz hawj daxboh. Daxboh guh soujsuz le singj dauq lo.

Yienznaeuz miz hozcoz yw bingh bauqsiu, hoeng lij aeu gyau 2 fanh lai maenz ngaenz, neix doiq ranz gou daeuj gangj dwg hung lumj mbwn nei. Bit cienz baenzneix lai, gou caen mbouj rox ra bouxlawz ciq?

Lajbyonghngoenz, Mauz boh’au caeuq geij boux caencik daj lajmbanj daeuj yawj daxboh, dawz aen daeh bongzbedbed ndeu ndenq hawj gou naeuz: “Neix dwg 21000 maenz ngaenz, dwg dou daengx mbanj seiqcib ngeih ranz vunz comz daeuj hawj boh mwngz yw bingh.”

Gou naeuz:“Ranzlawz hawj geijlai ngaenz, gou cungj sij yiemqdiuz hawj gyoengqde, ngoenzlaeng lij boiz hawj daihgya.”

Mboujliuh, boh’au gyoengqde geij boux cungj baetfwngz, naeuz: “Gak boux beixnuengx gangj lo, cienz neix mbouj yungh boiz lo.” Gou baez ngawh, mbouj rox gij yienzaen ndawde. Boh’au gangj le gienh saeh 20 bi gonq hawj gou. De naeuz: Miz haemh byonghhwnz ndeu, mbwn doek fwn hung, daxboh mwngz youq mwh ganj loh laep dauqma, yungh dienhdoengz laemz hwnj bo laengmbanj, siengj mbouj daengz raen goengq bo miz di loemqlak, Daxboh rox daengz yaek miz gijmaz saeh lo. Yienghneix, de goq mbouj ndaej dawz gij doxgaiq bonj ranz okdaeuj, couh soemhfwn bae it ranz it ranz roq dou, heuh gak boux beixnuengx cienj daengz dieg ancienz bae. Gyoengq beixnuengx cienj okdaeuj mbouj nanz, goengq bo sikhaek lak roengzdaeuj, moek baenz buenq aen mbanj.

Boh’au doeklaeng naeuz: “Danghnaeuz mbouj miz boh mwngz, ndawmbanj gong lai vunz senqsi mbouj youq aen seiqgyaiq neix lo.”