Cejdaih bineix 70 bi lo, dingq daxmeh gangj, cejdaih daj iq cix gig lingzleih, ngamq bet bi, cix rox bang vunzmbanj raiz saenq、daenggeiq goeng- faen lo, cejdaih gag hag rox ciengqgo, dinfwngz youh ndei, de rox daemjrok, rox nyumxbaengz, rox caizbuh, rox ding haiz hwnj haiz, ranz gou bohmeh caeuq caet beixnuengx, daengx ranz gouj boux vunz, gij buhvaq、haiz、mad、mauh, cungj dwg cejdaih gag caiz gag nyib, bouxboux daenj ndaej habndang gvailili.

Cejdaih geiqsingq gig ndei, gvaq da mbouj lumz, bouxlaux lwnhgoj, de dauq daengz ranz cix daj gyaeuj daengz rieng gangj hawj dou geij beixnuengx dingq.

Hoeng, daxmeh gou yawj lwgsai dij, yawj lwgmbwk cienh. De doiq cejdaih naeuz：“Lwgmbwk dwg aemq gyoi bae gip riengzhaeux, mboujmiz lwgmbwk aemq daeh bae doegsaw nauq.” Yienghneix cejdaih ngamq doeg daengz siujyoz ngeih nienzgaep le, couh dauqma dawz nuengx, mbouj caiq ndaej haeuj hagdangz lo. Hojsik lai lo!

Yienznaeuz yienghneix, cejdaih soq- laiz mbouj ienq bohmeh saek coenz, geijcib bi gvaqbae le, dou geij beixnuengx baez gangjdaengz cejdaih guh hong sinhoj baenzciuh vunz gij saeh neix, raemxda couh doek daengz buh dumz bae, cejdaih dauqfanj riunyumnyum naeuz: “Gou raen sou geij boux nuengx ndaej doegsaw, bouxboux baenzvunz gvaq ndaej ndei, gou caiq sinhoj hix mbouj lau.”

Cejdaih daj iq daengz geq, rox ndiep bohmeh, rox goq beixnuengx, soqlaiz mbouj ndaq vunz, gwnz naj de cungj dwg riunyumnyum.

Cejdaih gig gaenx guh hong, ngoenz ndit ngoenz fwn cungj mbouj dingz youq ranz, hong naek hong mbaeu hix mbouj genj, ndawmbanj bouxboux cungj haenh de.

Daengz seiz hong mbouj nyaengq, dahcej couh youq gyangranz biq(bu) bwnz sat ndeu, dou geij beixnuengx gyingj youq gwnz sat guhcaemz, cejdaih cix itmienh ding haiz itmienh lwnhgoj, aen goj “dahgyax dahbengz” dou cungj dingq sug liux. Cejdaih ciengqgo gig ndei dingq, de hix rox doiqfwen dem, cib leix bet mbanj cungj okmingz. Seizde, dahcej gaenq caeuq daxmeh doengzcaez hwnj daiz bae ciengqheiq gvaq, de ciengq aen go 《Yingjsanhhungz》, sing unq- ngaeungaeu, daengz seizneix gou lij geiq ndaej maenhmwdmwd.

Seizde cejdaih ciengzseiz gaen vunz- mbanj bae vat suijli, baez bae couhdwg buenqbi lai, dou geij beixnuengx muengh cejdaih lumj muengh daxmeh bae haw nei, lumj muengh haemh bet nyied cibhaj vaiq daengz cij ndaej gwn bingj nei, aenvih cejdaih dauq le, dou couh miz saej- daeuz gwn, cix miz goj dingq, ndawranz cungj angqfwdfwd.

Cejdaih 28 bi cij okhaq, de mbouj nyienh haq vaiq, hix mbouj nyienh haq bae gyae, doeklaeng, de haq youq ndawmbanj, ranz cejfou liz ranz daxmeh mboujdaengz 100 mij, cejfou vunz gaenx simndei, cej- daih naeuz:“Yienghneix ngoenzngoenz ndaej raen bohmeh beixnuengx, sim onj.”