Mingh mbouj doengz vunzlai,

Nyienh dai bae gaxgonq,

Geij yiengh bingh doxgyonj,

Cai haeux donq mbouj cimz.

Caeuq vunz gangj doengz gangj,

Caeuq vunz angq doengz yungz,

Bohmeh ciengx gou hung,

Rox yungz gijmaz yiengh.

Seng gou daeuj mbouj dij,

Bae gij(geij)lai ngaenzcienz,

Bae gvaq fanh gvaq cien,

Ien goek mbouj baenz mingh.

Ngoenz gwn youq ndaw ranz,

Sim gou fan lumj haij,

Yied ngoenz yied doeknaiq,

Sim gyaih nanz lwnh vunz.

Mehmbwn a mehmbwn,

Youq gwnz yiuq dauq laj,

Gou da mbouj ndaej lah(yawj) ,

Baenzhaq vunz mbouj aeu.

Heuh mbwn mbwn mbouj han,

Cam namh namh mbouj vah,

Mingh gou lumj nyapnyaj,

Daej gvaq ngoenz gvaq hwnz.

Hwnj mbwn mbwn cix sang,

Roengz gyang namh cix ndaet,

Yied ngeix sim yied saet,

Saihoz ndaetndingnding.

Naeuz mbouj ngeix mbouj ngeix,

Gigheiq youq simdaeuz,

Ndaenq mbouj miz giz naeuz,

Mingh gou yienghneix cienh.

Mbouj baenz mbwn cix sou,

Gaej ce gou lajdeih,

Lumj oen coeg swhgeij,

Youq gigheiq linlin.

Song da mbouj raen rongh,

Guh hong hix mbouj baenz,

Ngoenz hix yawj mbouj raen,

Hwnz hix faen mbouj cingh.

Aeu fwngz guh lwgda,

Baengh song ga guh maenh,

Byaij gvaq mbaenq(giz) youh mbaenq,

Sim gaenj bae mbouj deng.

Aen rwz ronghriri,

Ndaenq ngvihda mbouj baenz,

Lij iq couh mbouj raen,

Gwnzmbwn faenz yienghneix.

Mbouj gwn dungx cix iek,

Gwn dungx cieglilwn,

Guhdoih youq lajmbwn,

Mbouj doengz vunz doengz doih.

Caeuq vunz gangj doengz gangj,

Dangq raemx lae gvaq giuz,

Caeuq vunz riu doengz riu,

Mbouj siudiuz lumj doih. （4）