Sai:

Daengz bet nyied cibhaj,

Daengj yahdoengz eu fwen,

Guhdoih yawj ronghndwen,

Guhdoih eu fwenlienh.

Mbwk:

Daengz bet nyied cibhaj,

Vunz cienq naj coh feiz,

Boux miz youx cix ndei,

Gou coemh feiz yietnaiq.

Sai:

Cibhaj ronghndwen singj,

Aeu bingj baiz ronghndwen,

Baiz bingj caiq cang yieng,

Cingj baedsien daeuj hoh.

Mbwk:

Cibhaj ronghndwen singj,

Mbouj raen ngaeuzingj mwngz,

Daeuj daengz dieg gaeuq ndwn,

Caj mwngz aeu coenz vah.

Sai:

Daengz bet nyied cibhaj,

Caj dahnuengx aeu haiz,

Rox nuengx miz haiz lai,

Faen hawj gvai(gou) saek doiq.

Mbwk:

Mwngz cam gou aeu haiz,

Gou cix maij gwn bingj,

Bingj luenz rangringring,

Aeu daeuj gingq vunzlai.

Sai:

Aeu haiz bae vuenh liengj,

Youx mbouj siengj geijlai,

Aeu bingj bae vuenh haiz,

Lau youxgvai mbouj nyienh.

Mbwk:

Aeu bingj daeuj vuenh haiz,

Gou raen ndei lailai,

Mwngz caen hawj dahraix,

Gvaq haij gou hix riengz.

Sai:

Beix ndiep cix soengq gyaep,

Nuengx naek cix soengq haiz,

Cibhaj bungz nuengxgvai,

Ndaej doiq haiz yawj yiengh.

Mbwk:

Aen gyaep venj gwnz fa,

Haizva coq ndawgveih,

Cibhaj gyau cingzngeih,

Fanh seiq mbouj lumz cingz.