Gonj yienzbit hau ndeu cingq gyangz- naek danqheiq, de naeuz: “Bouxcawj gyaez yienzbit saek wnq, ciengz yungh gyoengqde daeuj veh veh, cix mbouj gyaez gou. Gou moix ngoenz cij ndaej youq ndaw habbit saekraiz haenx youq, mbwq dangqmaz! Gou yaek deuz ok rog bae youz, bae yawjyawj aen biengz vava loegloeg baihrog haenx.”

Yienzbit hau byaij ha byaij ha. De yawjraen duj va henz loh, duj va miz limqva ndingyanyan, gyaeundei dangqmaz! Yienz- bit hau doiq duj va naeuz: “Dahnuengx va, mwngz aeu aen mauh nding mwngz ciq hawj gou ndaej lwi? Yienghneix bouxcawj couh gyaez gou lo.” Duj va naeuz: “Mbouj ndaej ha! Neix dwg bouhfaenh aen ndang gou ndeu, mbaet roengzdaeuj ne, gou couh in lai bw.”

Yienzbit hau nyapnyuk dwk byaij ha byaij ha. De yawjraen benq naz meg henjgim ndeu, couh doiq go meg naeuz: “Daeggo meg, mwngz aeu aen mauhhenj gwnz gyaeuj mwngz ciq hawj gou ndaej lwi? Yienghneix bouxcawj couh gyaez gou lo.” Go meg naeuz: “Mbouj ndaej ha! Neix dwg gou sinsin hojhoj cij ok gij riengz neix, mbouj miz le, gyoengqvunz hix gig siengsim bw.”

Yienzbit hau laebdaeb byaij ha byaij ha. De daeujdaengz henz aen daemz ndeu, yawjraen mbaw’ngaeux heuyauyau, couh doiq mbaw’ngaeux naeuz: “Dahcej mbaw’ngaeux, mwngz aeu liengjheu mwngz ciq hawj gou ndaej lwi? Yienghneix bouxcawj couh gyaez gou lo.” Mbaw’ngaeux naeuz: “Mbouj ndaej ha! Liengj iq dwg hawj duz goep guh aen daiz ciengqgo、hawj duz gvi dangj ndit, hawj duz goep yietnaiq bw.”

Yienzbit hau byaij gien ndeu le, gijmaz hix ciq mbouj daengz, cijndei naiqnuknuk ma daengz ndaw habbit saekraiz de. Sawqmwh, de siengj ok aen banhfap ndeu, buet daengz gwnz veh bouxcawj bae, hawj va nding dem hwnj simva hau, hawj go meg henjgim dem hwnj diemj rongh saekhau, caiq hawj mbaw- ngaeux heuyau dem hwnj raemxraiz saekhau. Bouxcawj yawjraen le, angq dwk naeuz: “Laxlawz yienzbit hau baenzneix miz yungh ha!”

(Sanhdungh Linzyiz Si Daizcwngz Yen Daih’it Sizyen Siujyoz Du Yisenh)