Gou miz duz douqhau dwggyaez ndeu, dwg mwh ndwencieng daxboh soengq hawj gou. Gou an aen coh ndeidingq ndeu hawj de—— duzfuk.

Duzfuk daengx ndang yungzyubyub, lumh hwnjbae unqnemnem mboengmbwtmbwt, ndei lumh dangqmaz. Gyae’gyae yawj de, lumj dujfwj nei, dwggyaez raixcaix. Lwgda duzfuk ndingyanyan, lumj song naed baujsig nding nei, rwz de youh raez youh soh, seizseiz haeujsim gij doenghdanh seiqhenz.

Lauxbaegnding dwg gijgwn duzfuk ceiq maij gwn haenx. Mwh gou dawz lauxbaegnding okdaeuj, de couh sikhaek buet gvaqdaeuj, yienzhaeuh gaemz hung haeb gwn, ndaw bak lij fat ok sing “gaca gaca” daeuj. Danghnaeuz gwn imq lo, de couh guh gij saeh cabheiq—— dawz gijgwn ndaw vanj saiq ok rog daeuj, daxmeh yawjraen le hozndat raixcaix.

Duzfuk maij youq gwnz yangzdaiz dak ndit, yawj gij yiengh gikgyan ninz dwk de, itdingh gig cwxcaih ba! Gou moix ngoenz ma daengz ranz, gienh saeh guh daih’it couh dwg caeuq duzfuk guhcaemz, de yawjraen gou ma daengz ranz, couh angqvauvau buet gvaqdaeuj coux gou.

Duz douqhau dwggyaez youh diuqbeiz neix, gou yaek ciengxlwenx caeuq de guh baengzyoux ndei!

(Gvangjsih Vuzcouh Si Sinhhingh Wlu Siuyoz Ciz Cunghcwngz)