Vahsug gangj: “Ndaem gva ndaej gva, ndaem duh ndaej duh.” Seiziq gou aenvih coenz vah neix, guh ok le di saeh hozoiq ndeiriu ndeu.

Geiq ndaej najranz laengranz daxbuz cungj dwg reihnaz, mwh iq gou daegbied maij daengz ndaw reihnaz guhcaemz. Haenx dwg ngoenz cingeng ndeu, gyoengq vunzhung cungj nyaengq doekceh. Gou geizheih cam daxbuz: “Buz, yienghneix caen ndaem maz ndaej maz ha?” “Dangyienz lo! Namh neix saenzgeiz lai bw!” Daxbuz han naeuz. Dingq gij vah daxbuz, gou fwt siengj ok aen cawjeiq ndeu: “Ndaw rug gou lij yo miz song naed dangznaed gou ceiq maij gwn haenx, danghnaeuz dawz dangznaed ndaem roengzbae, yienghneix seizcou gou mbouj couh ndaej daengz haujlai dangznaed luha?”

Gangj guh couh guh, swnh daxbuz ninzringz, gou yaemj din yaemj fwngz dawz song naed dangz cuengq haeuj daehbuh bae. “Aeu gijmaz daeuj vat namh ne?” Gou gag gangj gag naeuz, “Miz lo!” Gou laeglemx haeuj ranzdajcawj bae, aeu gucanj daxbuz caujbyaek haenx, buet bae ndaw reih. Gou senj gaiq dieg hoengq ndeu, singjgaeh yawj seiqhenz, seizde cingqngamj mbouj miz vunz, couh vid genbuh haigoeng lo. Gou aeu gucanj vat aen gumz iq laeg ndeu gonq, yienzhaeuh mbiq ceijdangz ok, nyaenx mbouj ndaej riz naed dangz mbat ndeu, gaendwk siujsim riri dawz dangz cuengq haeuj aen gumz iq bae. Doeklaeng, gou aeu namh dienz aen gumz iq rim, caiq yungh din caij namh bingz, baek hwnj nga faex ndeu guh geiqhauh. Ndaem ndei le, gou laep da hwnj gikdoengh dwk mbaenj naeuz: “Dangznaed dijbauj, vaiq di majhung bw!”

Ciep roengzdaeuj geij ngoenz, gou cungj nyinhcaen rwed raemx dwk coq hawj dangz- naed……

Mbouj geij nanz, gou madaengz ndaw singz doegsaw, ndaw uk cungj siengjsieng dangznaed baenzlawz majhung: Didngaz、maj sang、hai va、giet ok baenz roix baenz roix dangznaed gak saek gak yiengh. Cungjsuenq ngaiz daengz geiqciet ndaej- sou, gou ngaeq daxboh daiq gou ma ranzcoj. Ma daengz ranzcoj, gou angqvauvau bae ra go faex- dangznaed gou ndaem haenx, cix yawjraen gaiq dieg gou ndaem dangznaed haenx mbouj miz saek yiengh. Gou gyaengj youq lo……

Gou hujdengdeng buet bae ra daxboh: “Daxbuz yaeuh vunz, de naeuz ‘ndaem gva ndaej gva, ndaem duh ndaej duh’, vihmaz gou ndaem dangznaed mbouj ndaej dangznaed ha?”

Daxboh dingq gou gangj le, got dungx riuhaha: “Dangznaed mbouj dwg doenghgo, mbouj didngaz ndaej bw! Caj mwngz majhung le couh menhmenh rox gij aumiz ndawde lo!” Gou lumj miz di rox nei ngaekngaek gyaeuj, hoeng ndawsim lij dwg vih song naed dangz neix hojsik.

“Ndaem gva ndaej gva, ndaem duh ndaej duh.” Haha, saedceij seiziq couh dwg yienghneix miz- yinx!

(Gyanghsuh Swngj Nanzdungh Gauh- sinhgih Siujyoz haj nienzgaep Cangh Swjmungz)