Gijmaz dwg vuenyungz? Go faex naeuz, miz roeg guh rongz ciengqgo hawj swhgeij dingq couh dwg vuenyungz; duz meuzlangh naeuz, miz aen ranz ndeu、bat raemx ndeu caeuq vanj haeux ndeu couh dwg vuenyungz…… Gou naeuz, miz daxmeh raemh cij dwg ceiq vuenyungz.

Mwh goq lanzgiuz roengzdangz, aen sing ndeu cungj gibseiz yiengj hwnj: “Yawj daengx gyaeuj hanh neix, vaiq aeu sujbaq uet, siujsim dwgliengz”; mwh hwnj goqmuengx, henz rwz cungj miz sing daezsingj: “Raek ndei nganxciuq hoh da, gaej liz bingzmuq gyawj lai, geiqndaej baujhoh ndei lwgda”; daengz mwh gwn haeux, geij coenz vah daengq haenx, cungj caeuq haeuxbyaek caez dawz hwnj daiz: “Haeux、noh、gyaeq、byaekheu, yienghyiengh cungj yaek gwn, caenhliengh gaej gwn gijgwn youzcaq”…… Gij raemh daxmeh buenx dwk gou gwn daenj guh saeh, lumj fwnmoenq nei nyinh gou go faexlwg neix vuenyungz majhung.

Gou lij mumjgyumq geiq ndaej mwh hwnj it nienzgaep, daxboh daxmeh bae okcai, ndaw ranz mbouj miz vunz ciuqgoq gou, bohmeh couh soengq gou bae ranznden camh youq geij ngoenz. Gou daekeiq siengj dwk: Daxboh daxmeh mbouj youq, mbatneix gou swyouz lo!

Ngoenz daihngeih, daxgoeng ranznden heuh gou hwnqdaeuj. Gou hai da yawj seizgan, cij roek diemj cib faen. “Daxmeh mbouj youq, mbouj miz vunz coi gou, caiq ninz haj faen cung ba!” Gou gag doiq swhgeij gangj. Mwh gou caiq baez hai da, yawj aen cung, dai lo! Gaenq roek diemj buenq lo, caiq mbouj okdou couh ganj mbouj hwnj cihagdangz lo!

Gou gipmuengz daenj buhvaq, vuengvat gwn geij gaemz haeuxcaeux, ganjvaiq hwnj cidienh- doengh daxgoeng ranznden bae. Mwh daengz giz caj cihagdangz, boux lauxsae fucwz cihagdangz haenx cingq simgaenj muenghyawj: “Boux doengzhag lawz caengz daeuj!”

“Gou! Cajcaj gou! Cajcaj gou!” Gou baegfofo han dwk. Doeklaeng, youq ndaw gyoengq doengzhag riu gou, gou diuqgah dangqmaz hwnj ci bae. Gou siengj, danghnaeuz daxmeh youq geijlai ndei ha!

Banhaemh, gou naetnaiq ma daengz ranz daxgoeng ranznden. Gou yawj mbouj raen daxmeh nyaengqnyatnyat haenx, dingq mbouj nyi daxmeh cam gou gvansim gou…… Neix dwg baez daih’it cimz daengz feih “gadog”.

Doeklaeng, ngaiz daengz singhgiz seiq, ndaej caeuq daxmeh doeng dienhvah sibinz lo. Ngamq ciep doeng dienhvah, gou couh naeuz: “Meh, gou siengj mwngz lai lo……” Gek aen bingzmuq soujgih, gou lumj daej nei doiq daxmeh naeuz, “Mwngz ndaej mbouj ndaej seizneix couh dauqma ha!”

Dienhvah mbiengjde cienz daeuj sing sugsed: “Lwg gvai, meh singhgiz roek couh dauqma, youq ranz daxgoeng, dingq vah bw……” Daxmeh raemh dwk, “Geij ngoenz neix mbwn nit lo, gya daenj geu buhrog ndeu, vuenh hwnj mad na; gaej ngaizhwnz, banhaemh caeux di ninz, ninz gaeuq ngoenz daihngeih cij miz cingsaenz hwnjdangz……”

Gou geiq mbouj ndaej baenzlawz cuengq dienhvah, henz rwz rwenz sing raemh daxmeh, baenzneix caenciet, baenzneix vandiemz.

Gij raemh daxmeh, dwg gij gyaez daxmeh. Gij raemh daxmeh cungh dwk gou、nyinh dwk gou、gujli dwk gou. Nyienh cungj raemh vuenyungz neix itcig rwenz youq henz rwz gou.

(Suhcouh Vaigozyij Yozyau Yij Cangzbingz)