Boux nungzminz ndeu ndaw ranz ciengx miz duz moulwg dwggyaez ndeu. Aen congh henz moulwg ninz haenx, youq miz duz cenh ndeu.

Mwh boux nungzminz gueng gijgwn ndeigwn hawj moulwg, moulwg couh youq baihnaj duzcenh angj naeuz: “Mwngz duz yakyawj neix, mwngz ndaej vih bouxcawj guh gijmaz ne? Mbouj cinj mwngz guh baengzyoux gou! Mwngz yawj gou geijlai ndei, miz gijgwn ndeigwn bw!” Duz cenh yawjyawj moulwg, youh yawjyawj gijgwn moulwg, siengj gangj youh mbouj gangj.

Ngoenz ndeu gyanghwnz, moulwg aenvih gwn imq lai, gyaengwgw ninzndaek lo. Mwhde, duz nyaenma iekngaungau ndeu, laeglemx ndonj haeuj ranz nungz- minz daeuj, yawjraen moulwg ninzndaek gyaengwgw haenx, ngah ndaej myaiz cungj rih lo. Nyaenma siengj: Lij dwg gou miz fuk, gou yaek gwn duz moulwg neix.

Nyaenma aj aen bak damgwn de, loh ok heuj soemset, siengj haeb gaiq ga moulwg, rag moulwg ma ranz gwn donq imqimq he. Sawqmwh, yiengh doxgaiq luenzlu ndeu ringx coh aen bak nyaenma, camz aen bak nyaenma ok lwed lo, nyaenma in ndaej hemqyaya. Moulwg fwt daj ndaw loq ndiu daeuj lo, deng hwk ndaej naj beg liux. Boux nungzminz dingqnyi sing hemq ganjvaiq buet gvaqdaeuj, nyaenma raen mbouj ndei lo, vuengmuengz deuzbae.

Moulwg rox dwg duz cenh bingzseiz de yawj mbouj hwnj da haenx gouq de, naj nding lo, gyo’mbaiq dwk naeuz: “Gyo’mbaiq mwngz gouq gou, gou mbouj caiq yawj mbouj hwnj mwngz lo, mwngz cij dwg baengzyoux caencingq gou!” Duz cenh riuriu le, mbouj hoizdap de, baenq ndang ma daengz aen congh swhgeij.

Daj neix hwnj, mwh boux nungzminz gueng gijgwn ndeigwn hawj moulwg, moulwg cungj louz mbangj ndeu hawj duz cenh; duz cenh gingciengz hen youq henz moulwg, gyoengqde baenz doiq baengzyoux ndei ngumh mbouj liz ngaeuz ndeu.

(Sanghaij Swhfan Dayoz Fusuz Vaigozyij Siujyoz Huz Hausenh)