Doenghbaez miz mbaw faex iq ndeu, de gyaez bae youz.

Mbawfaex iq mbin ha mbin ha, miz ngoenz ndeu de mbin daengz bakdou ranz duz moed. Moed iq ngamq siengj gvaq dah bae, couh aeu mbawfaex iq dangq- guh aen ruz ndeu. Duz moed naengh youq gwnz “ruz”, onjonj dangqdangq gvaq dah bae.

Raq rumz ndeu ci gvaq, mbawfaex iq youh hainduj bae youz lo. De mbin ha mbin ha, mbin daengz gwnz dujva maeqmwt oiqet bae. Duz nonnyaiq ndeu raih gvaqdaeuj, yawjraen mbawfaex iq, nonnyaiq angq dwk naeuz: “Gou ndaej dawz de daeuj guh fandenz gou bw!” Nonnyaiq hoemq fan “denz” youq ndaw limqva ninz- ndaek lo.

Raq rumz ndeu ci gvaq, mbawfaex iq youh bae youz lo! De mbin ha mbin ha, youq gyang- mbwn gvaengxgvax haujlai nanz cij doek roengzdaeuj. De doek daengz gwnz bonj saw dahniq ndeu bae. Dahniq yawjraen mbawfaex baenzneix gyaeundei, angq lai lo, dahniq dawz mbawfaex daeuj guh ciemsaw, geb youq ndaw saw homfwdfwd haenx. Mbawfaex gag siengj: Yunghcawq gou gig hung ha! Mbawfaex iq bae baenzlai deihfueng youz, de baeg lo, naet lo, youq ndaw sawmaeg homfwd menhmenh ninzndaek lo.

(sam nienzgaep Cwnz Mozhanz)