“Seizneix mbouj noix lwgnyez doengh mbouj doengh couh doiq bohmeh fatheiq, yinxhwnj bohmeh ndaq moeb de, hoeng gizsaed bohmeh hix dwg vih lwgnyez ndei……” Vunz ranz gou itmienh yawj sinhvwnz itmienh gangjgoj.

Yawj dwk yawj dwk, daxmeh baenq gyaeuj gvaqdaeuj naeuz: “Veivei, gou ngamq siengj daengz aen banhfap ndei mehlwg dox gaeudoeng ndeu. Coumued song boux raeuz doxvuenh ‘ndang’, mwngz dang meh, gou dang lwg, baenzlawz yiengh?”

Singhgiz neix lauxsae anbaiz cozyez gig lai, cingqndei hawj daxmeh cimzcimz dang hagseng baenzlawz dwgrengz. Gou sikhaek han naeuz: “Couh yienghneix guh!”

Ngoenz singhgizroek daengz lo. Gou cingq ninzndaek, sawqmwh, gaiq fwngz ndeu lumh aen naj gou. Gou fwt ndiu lo, laxlawz dwg daegnuengx. Yawj seizgan, lij mbouj daengz roek diemj. Yawjdaeuj gou mbouj ndaej ninz lo.

Daegnuengx raen gou mbouj hwnqdaeuj, couh sing hung daej lo. Gou mbouj dingz heuh daxmeh, hoeng mbouj dingqnyi daxmeh han.

“Ngoenzneix dwg ngoenz doxvuenh ‘ndang’.” Gou sawqmwh siengj hwnj gienh saeh neix, cijndei “vid genbuh hwnj haenqrengz guh” lo! Gou umj daegnuengx hwnj, gig mbouj yungzheih bang de vuenh ndei vaqnyouhceij. Daxmeh mbouj dwg lij cingq ninz ba? Gou umj daegnuengx daeujdaengz ndaw rug daxmeh. Cij raen daxmeh cingq nyinhcaen biengj yawj saw yijvwnz, bonj cozyez hai youq gwnz daiz……

Gou laeglemx byaij ok aen rug: Yawjdaeuj gou hix gyayouz guh cij ndaej lo, mbouj ndaej hawj daxmeh yawjsuij bw! Gou yaek dawz ok bonjsaeh gou daeuj cawj donq mienh makyungz laeblaz ndeu. Mwh gou cingq nyaengqnyatnyat, daegnuengx cix fat beizheiq lo, de moeb gou dik gou, gou dawz soujgih hawj de boenz de cij dingh roengzdaeuj. Mienh cawj ndei le, gou rag aen ndang naetnaiq bae heuh daxmeh daeuj gwn. Baez dingqnyi gwn haeuxcaeux, daxmeh daj diegnaengh ndwn hwnjdaeuj: “Cozyez neix caen lai, mbat ndeu guh mbouj sat, ganjvaiq gwn haeuxcaeux gonq.”

Laxlawz daxmeh gizneix hix miz vwndiz ha. Mboujgvaq, nyaengq dwk bwnq mienh hawj daegnuengx gwn, gou gizlawz lij miz seizgan daeuj riu de lo!

Gyanghaet mbat nyaengqnyat neix gou gaenq mbouj miz naihsim lo, haeuxngaiz cijndei cawx gijgwn baihrog daeuj gaijgez lo. Caeklaiq daxmeh itsim yungh youq gwnz daez ausu, hix mbouj goq ndaej miq gou. Gwn sat haeuxngaiz le, gou miz di baiqninz, daegnuengx hix nunu lwgda. Gou couh umj daegnuengx yaeuh de ninz.

Daegnuengx cungjsuenq ninz lo. Gou ngamq ma ndaw rug gou, de youh ndiu lo. Gou cijndei dauq ninz daengz henz ndang de, bek ndang de yaeuh de ninz, daegnuengx cij caiq laep da ninz. Gou yiemj din yiemj fwngz hwnqdaeuj, sawqmwh roxnyinh ga fwngz gig in, laxlawz gou haxbaenh yungh cungj yienghceij ndeu ninz nanz lai, ga fwngz cungj mwnh lo!

Gou nunu genfwngz byaij ok ndaw rug, daxmeh cingq dak ninz youq gwnz sahfaz, gou hix naiq ndaej naengh roengzbae.

“Ai, dang daxmeh caen naet ha!”

“Mwngz cungjsuenq rox gij sinhoj gou lo!”

Gou cam daxmeh: “Mwngz guh ngoenz hagseng ndeu mbouj naet ha?”

Daxmeh naiqnuk han naeuz: “Gangj saedvah, caencingq naet ha. Sou siujhagseng hix mbouj yungzheih ha!”

Ngoenz vuenh “ndang” neix yienznaeuz naet, hoeng gou caeuq daxmeh cungj roxnyinh gig miz yiyi. Gou coemj haeuj ndaw rungj daxmeh bae, daxmeh hix got dawz aen mbaq gou, song boux dou lumj song boux cansw nei ndaetnet got youq doxcaez……

(Sanhdungh Cinghdauj Si Dayoz Lu Siujyoz Cau Veigyauz)