Gwnz loh cuengqhag ma ranz, gizgiz cungj dwg sing “dududu” “gunggunggung”, laxlawz dwg gih- rauqnaz nyaengq dwk rauqnaz, gihndaemnaz nyaengq dwk ndaemnaz ne!

Ma daengz ranz, gou couh rag fwngz daxbuz guh’unj naeuz: “Buz, cozyez gou youq hagdangz gaenq sij sat lo, gou caeuq mwngz caez bae ndaemnaz, ndei lwi?” Daxbuz euq mbouj gvaq gou, cijndei dapwngq gou lo. Gou riengz laeng daxbuz saetsaet yatyat bae ndaw naz lo.

Daxbuz nyoengx ci iq, dawz gyaj baenz gienj baenz gienj soengq daengz henz naz, bouxndaemnaz caiq dawz go gyaj heuyauyau haenx, siujsim baij youq gwnz gih- ndaemnaz. “gunggunggung” gih- ndaemnaz hainduj ndaemnaz lo, bouxndaemnaz yat hwnj gwnz gih- ndaemnaz bae, gihndaemnaz soengset hai bae naj, baihlaeng louz roengz baenz baiz baenz baiz gyaj caezcaez cingjcingj, couh lumj swbingh lieddoih ndwn youq gyang naz nei. Gou ndwn youq gyaeuj naz geizheih yawj dwk, ha, aen gihndaemnaz neix saenzgeiz lai lo! De gingqyienz ndaej vaiqvet youh caezcingj aeu gyaj ndaem roengz naz bae, caen ak lai bw! Daxbuz hix youq henz nam naeuz: Lij dwg gihgi yendaiva ndaemnaz ndei ha! Gou cam daxbuz: “Mwngz gag gangj gag naeuz gijmaz ha?” Daxbuz naeuz: “Gaxgonq cungj dwg aeu vunz baenz go baenz go gyaj ndaem roengz naz bae, couhcinj daj haet nyaengq daengz haemh, baeg ndaej ndang naiq hwet in, hix cij ndaem ndaej gaiq naz ndeu. Seizneix ndei lo, youh vaiq youh mbaet rengz.” Gou itmienh dingq daxbuz gangj gij saeh gaxgonq, itmienh naemj gij vah daxbuz gangj haenx, ndawsim roengz gietsim: Gou itdingh ndeindei doegsaw, fatmingz engqlai gihgi yendaiva, hawj boh- lungz nungzminz guh nazreih engq soengset.

Mbouj yaep ndeu, gaiq naz ndeu couh ndaem sat lo. Yawj gvaqbae, go gyaj heuyauyau lienz baenz benq ndeu, gyoengqde aj aen bak hung, gaemz hung gwn raemx ndaw naz, lumjdwg cungj ceng dwk vaiqvaiq majhung nei.

W, bineix itdingh youh dwg bi demsou ndeu!

(Gyanghsuh Nanzdungh Si Yuzdungh Yen Youjyiz Lu Siujyoz Cangh Hungzcouh)