Mwh gou sam seiq bi, ranz gou lij gig hoj: Seiq fungh ranzvax gaeuqgeq, aenhongh mbouj miz veizciengz, aenvih aen ranz gaeuq lai mbouj coih gvaq, mizseiz gyanghaemh youq ndaw ranz cungj yawj ndaej raen ndaundeiq; dax- goeng daxbuz daengx bi guhhong, bi ndeu roengzdaeuj, lij dwg gwn mbouj imq daenj mbouj raeuj.

Daengz seizhah, duznyungz ranz daxgoeng lai dangqmaz, lumj fatbag nei daeuj haeb gou, haeb ndaej ndang gou hwnj nwnj youh hung youh nding humzhanghang. Bungz daengz fwn doek, ranz rohyaegyaeg, ndaw ranz baij rim bat doengj daeuj ciep raemxfwn, cungj mbouj miz dieg byaij lo.

Sam bi gonq, gou riengz daxboh daxmeh daeuj ndaw singz, doeklaeng ranz daxgoeng hix bienq lo: Bet fungh ranzvax hunghwd daj ndaw dieg soengz hwnj, duznyungz dwgcaengz hix deng laengz youq rog cuengsa, cien mong hix yungh cienmeng hau daeuj nem hwnjbae, youq aen ranz yienghneix youq cwxcaih lai lo.

Bi’gvaq, ranz daxgoeng dem le haujlai doxgaiq: 55 conq densigih yawj cingcuj raixcaix, sijyihgih cienz swdung swiq buh ndaej seuqsaksak, gunghdiuz vih dou soengq daeuj rumz liengz…… Gij doxgaiq neix vih daihgya daiq daeuj fuengbienh, gwnz naj daxgoeng daxbuz cungj dwg riunyumnyum.

Daxmeh naeuz, gij bienqvaq neix cungj liz mbouj ndaej gij fazcanj hung guekcoj raeuz. Guek- coj, gou yaengx mehfwngz haenh mwngz!

(haj nienzgaep Huz Hanzhih)