Seizcou, byaij youq ndaw reihnaz, nyouq daengz meg rang mak hom, byaij youq ndaw ndoengfaex, yawjraen mbaw henj mbaw hoengz, byaij youq ndaw rumz iq, roxnyinh sim soeng vaiqvued……Seizcou ndei baenzneix, vunz baenz- lawz mbouj maij de ne?

Gou maij ronghndwen seizcou. Ronghndwen seizcin najnyaenq, lumj boux lwgnding nei, lienz rongh de cungj mbouj rongh geijlai; aen ronghndwen seizhah ronghsagsag, dawz aen conghcueng cien gya fanh hoh ciuq ndaej haucancan; ronghndwen seizdoeng nitgyoet, lumj boux dahsau dasang ndeu, fanhfaed youq laj ronghndwen seizdoeng cungj yienh ndaej nityatyat, mbouj miz senggei; cij miz rongh- ndwen seizcou hozswnh, ndwn youq laj mbwnhaemh, ngiengx gyaeuj yawj ronghndwen, cungj siengj aeu de dangguh baengzyoux gyausim, dawz vah ndawsim gangj hawj de nyi.

Gou maij gij reihnaz seizcou. Din dieb youq gwnz namh ndaem biz haenx, mwngz roxnyinh daengz vunzloih gohgi caiq baenzlawz fatdad, gij goekrag neix, itcig dwg gvihaeuj daswyenz. Bungj gaem haeuxgok henjgim ndeu hwnjdaeuj nyouq, mwngz couh rox, cijmiz seizcin、seizhah sinhoj lae hanh, cij vuenh ndaej daeuj gij henjrwgrwg neix.

Gou maij mbawloenq seizcou. Bungj bonjsaw, daeujdaengz laj go faex ndeu, baeg le, mbouj haeujsim baez ngiengx gyaeuj, gij mbaw henj haenx sawqmwh mbin daengz ndaw saw daeuj, sijsaeq yawj gij mbawloenq haenx, couh lumj yawjraen ciuhvunz de: Youq ndaw rumzcin, de daenj geu buh heu he, iet gyaeuj okdaeuj, gamjsouh nditndat raeujrub、fwncin diemzsub、rumz iq cifefe; seizhah, nditndat lumj feiz, deng ndat ndaej ajngaeb heiqsaek, hoeng lij roengzrengz ndwn soh, cij siengj lai soengq faenh yaemliengz ndeu hawj gyoengqvunz; seizcou mbwn gvengqlili, dienheiq liengzsangj, mwh gyoengqvunz bouxboux gwnz naj loh gij angq ndaej fungsou, de guhbaenz le sawjmingh daj gwnz gofaex mbin roengzdaeuj. Hoeng de mbouj gamsim, roxnyinh swhgeij wnggai caiq guh di saehndei、saeh miz eiqsei haenx, yienghneix, de mbin daengz ndaw saw bae, guh le mbaw ciemsaw ndeu, hawj sengmingh ndaej daengz ciengxlwenx gyaenanz!

Youq laj ronghndwen gangj vah ndawsim, youq ndaw naz soundaej hoizbauq, youq laj gofaex cinghseuq aensim……

Gou maij seizcou!

(Yinznanz Swngj Gunhmingz Si Anhningz Si Sizyen Yozyau haj nienzgaep seiq ban Yangz Cinghyaj sij, Veiz Yennaz hoiz)