Dingq daxgoeng gangj, 20 sigij 70 nienzdaih co, vunzlai okdou dingzlai cungj dwg baengh din byaij loh, gawq sai rengz youh sai seizgan. Seizde, danci caeuq aencibuh、soujbiuj caez heuhguh “sam daih gienh”, diegvih de couh lumj ciiq seizneix nei. Danghnaeuz ranz lawz miz gyaq danci moq ndeu, couh lumj ndaejdaengz yiengh doxgaiq dijbauj citgeiz ndeu, hawj vunz hozhaenz dangqmaz.

70 nienzdaih mued, vihliux ciep- soengq daxboh youq yienhsingz hwnj gauhcungh haenx, daxgoeng haenqsim dawz ok gij cienz rom ndaej geij bi haenx, cawx gyaq danci ndeu. Danci gwih ma ranz, daengx ranz vunz gikdoengh dwk yawj le youh yawj, lumh le youh lumh. Daxboh naeuz, mwh baehag gwih danci, couh lumj vunz ciuhgeq naengh aengiuh vunz ram nei, miznaj dangqmaz. Gyaq danci haenx buenx daxboh doeg sat gauhcungh, youh buenx mehgux daengz gauhcungh bizyez.

Daengz le 80 nienzdaih, vunzlai youh gyaez hwnj cimozdoz. Gwih cimozdoz hai gvaq gwnz gai geh hongh, yinx daeuj haujlai vunz cimyawj. Daxboh youq yienhsingz hwnjban, liz ranz haemq gyae. Vihliux baedauq hwnjban fueng- bienh, daxboh mbaet gwn mbaet yungh, cawx ndaej gyaq cimozdoz ndeu. Couh yienghneix, cimozdoz couh baenz gyaqci daxboh hai bae danhvei caeuq ma ranz haenx lo.

Haeujdaengz 21 sigij, ciiq hainduj haeuj ranz beksingq bingzciengz bae lo. Vihliux hawj daxgoeng daxbuz nienzlaux haenx okdou mbouj deng rumz ci fwn rwed, daxboh daxmeh doxyaeng cawx gyaq ciiq ndeu. Youq mwh gou muengh bae muengh dauq haenx, daxboh hai gyaq ciiq moq ndeu ma daengz ranz lo. Ngoenz yietnaiq, daxboh angqvauvau hai ci daiq daengx ranz vunz okbae youz. Daxgoeng doenghsim naeuz: “Caen dwg loq cungj mbouj siengj daengz, gou ciuh vunz neix lij ndaej naengh ciiq ranz bonjfaenh ha.”

Daj byaij loh daengz danci, caiq daengz cimozdoz, cigdaengz ciiq, lizsij gyauhdungh gunghgi bienqvaq neix, guhcingq le ranz gou gwndaenj bienqvaq. Dou cimz gvaq gwndaenj gungzhoj doenghbaez, hix cimz daengz gij vandiemz sevei fazcanj ngoenzneix.

(Hoznanz Neiyangh Yen Cwngz- gvanh Cin Daih’it Siujyoz Maj Cinh- cwngz)