Gou gaenq dwg siujhagseng ngeih nienzgaep lo, vanzlij dwg lwgsai dem, hoeng baez youq ciengzhab vunz lai hawj gou gangj vah, gou couh miz di lau. Neix lumjdwg boux lwgsai mbouj wnggai miz cungj biujyienh neix ha.

Hagdangz yaek gawjbanh gangj gojgaeq doxdax, moix ban senj sam boux hagseng camgya, aiq dwg aenvih gou mbeiiq, lauxsae siengj lienhlienh gou, gingqyienz senj gou bae camgya. Gou gawq angq youh lau. Angq dwg gou ndaej leihyungh baez gihvei neix lienhlienh mbei gou; lau dwg dangh- naeuz gou biujyienh mbouj ndei aiq hawj ban gou doeknaj, hawj swhgeij doeknaj. Daj lauxsae lwnh gou seizde hwnj itcig daengz cuengqhag ma ranz, ndawsim gou cungj siengj gienh saeh neix. Mwh cuengqhag, gou gingqyienz lumz daehsaw youq ndaw gyausiz, mbouj aemq ma ranz lo. Vunz ndaw ranz cawzliux daxboh cungj riu gou, daxboh haenh gou dwg boux vunz guh saeh nyinhcaen ndeu, gaenjcieng gangjmingz gou yawjnaek baez gangj gojgaeq doxdax neix, daxboh heuh gou ndeindei cinjbi.

Haemhde, gou couh hainduj boih gojgaeq 《Gu Yenzvuj Gyaez Hag》 lauxsae bang gou senj haenx.

……

“Boux baihlaj gangj gojgaeq haenx dwg ngeih nienzgaep it ban Yez Swjgyah!” Dingqnyi bouxcujciz heuh coh gou, gou gaenjcieng ndaej cungj mbouj rox swhgeij dwg baenzlawz hwnj daiz bae. Gou roxnyinh swhgeij ndwn youq gwnz daiz, ga itcig saenz, gou roengzrengz ngiengx gyaeuj hwnj, naeuz: “Daihgya ndei, gou dwg ngeih nienzgaep it ban Yez Swjgyah, ngoenzneix gou gangj aen gojgaeq hawj daihgya haenx dwg《Gu Yenzvuj Gyaez Hag》……

Gou gangj sat le, doeksaet dwk dingqnyi laj daiz bekfwngz goksasa. Ma daengz laj daiz, banhcujyin caeuq daxmeh cungj haenh gou gig ak. Aen sim diuqbubbub gou cij dingh roengzdaeuj.

Doeklaeng, daxmeh hawj gou yawj sibinz ndaw soujgih de, gou raen swhgeij haujlai dungcoz cungj lumz guh lo, vanzlij gangj ndaej miz di vaiq, aenvih mwhde gou saedcaih gaenjcieng lai lo.

Gvaq geij ngoenz, hagdangz gunghbu mingzdan ndaej ciengj, gou gingqyienz ndaej cuj nienzgaep it daengjciengj, seizde gou gag siengj: “Laxlawz gou hix gig ak bw!”

(Liuzningz Danhdungh Si Gvanhden Cin Cunghsinh Siujyoz ngeih nienzgaep Yez Swjgyah)