Canghfapswd gwnzmbwn hainduj guhfap lo, muqmbwn goemq roengz- daeuj, ndaemndwtndwt. Mbawfaex gwnz go faex dinghsubsub mbouj nding saek di, duzbid mbouj hemq lo, seizgan hix cuengq menh yamqdin de, ciemhciemh dingz roengzdaeuj. Gou aemq hwnj daehsaw, gipgip muengzmuengz hwnj ci daxboh bae.

Canghfapswd gwnzmbwn yaengx hwnj song gaiq fwngz de, hob youq henz bak boq mbat ndeu, go faex hung yungh rengz bek fwngz、bi fwngz. Canghfapswd hainduj biujyienj lo! Gou yawjraen aen daehsuliu hau ndeu youq gwnzmbwn mbinyangyang, de dwg mbouj dwg gip dwk bae yawj biujyienj lone? Mwhde, bohliz gwnz ci miz “duzmoed” yied daeuj yied lai, gyoengqmoed youq gwnz bohliz raih dwk, bienq ndaej yied daeuj yied hung. Cij yaep ndeu, “duzmoed” couh bienqbaenz “duzrueg” youz byaij. Daxboh hai gaiqgvetfwn gyaep gyoengqde bae lo.

Canghfapswd laebdaeb vad gaiq faex fapswd de, de roq roengz gwnz daiz bae, “gunglunglung” sing byajraez hung ndeu yiengj hwnj, gou lau dwk gaem maenh giz fwngzgaem henz ndang. Canghfapswd gwnzmbwn yungh maefwn aeu gwnzmbwn caeuq gwnz- dieg san youq doxcaez. Gij heiqci raeuz couh lumj aen daeuq daemjbuh nei, youq geh maefwn ndonj bae ndonj dauq. Fwn doek youq gumz raemx gyang loh, hai ok baenz duj baenz duj va gyaeundei daeuj. Ci hai gvaq gumz raemx, raemx sinz hwnj gig sang, gyaqci couh lumj maj ok song gaiq fwed hung nei.

Canghfapswd gwnzmbwn naet lo, fwn couh bienq iq lo. Gou roengz ci gang aen liengj va byaij haeuj doih hwnjhag bae, aen liengj vava loegloeg comz baenz duz doengz gyaeundei ndeu. Mwhde, gwnzmbwn hix dap hwnj aen giuzdoengz ndeu, canghfapswd gwnzmbwn itdingh dwg naengh cimax, hai gvaq giuzdoengz bae camgya ciengz laj biujyienj lo.

(Gvangjdungh Cuhhaij Si Ginh- vanh Gih Hangzgungh Sinhcwngz Siujyoz Lij Veihsiu)