Liz ranz yied daeuj yied gyawj, henz rwz cungj rwenz gij sing Cangh lauxsae: “Ngoenzneix miz yiengh cozyez ndawranz daegbied ndeu, ma daengz ranz doiq vunz ndaw ranz gangj sing ‘gou gyaez mwngz’ ndeu!” Yiengh cozyez neix caen miz eiqsei! Gou doq byaij doq siengj gij yiengh daxmeh dingqnyi sam cih saw neix le gamjdoengh ndaej gangj mbouj ok vah daeuj, couh nyaenx mbouj ndaej riu ok sing daeuj.

Gwn haeuxcaeuz sat, gou ra seizgei, daihdamj byaij coh daxmeh. “Meh……” “W?” Daxmeh gyaeuj hix mbouj ngiengx, nyaengq sou duix. “Meh, gou……” Yienhsaed beij siengjsieng dwgrengz, sam cih saw neix caen siengj gangj ok bak, lij miz di mbouj ndei eiqsei. “Miz maz saeh ha?” Daxmeh yawj gou. Gij vah siengj gangj haenx gaz youq conghhoz lo, gou naj miz di ndat. “Gou…… gou gyaez mwngz!” Gou dwgrengz gangj ok sam cih saw neix, lwgda vueng ndaej mbouj rox yawj gizlawz cij ndei. Daxmeh gyaengj youq, gou sim siengj: Hwhw, daxmeh itdingh gamjdoengh luba? Yi, neix dwg gijmaz biujcingz? Ngeizvaeg? Doeksaet? Baenzlawz la? “Gangj ba, dwg mbouj dwg youh deng lauxsae miq lo? Bak baenz van, dwg mbouj dwg nyex hux lo?” Gou gip lo, gyaeuj binaunau: “Mbouj dwg mbouj dwg law, meh, gou mbouj nyex hux, ngoenzlwenz lauxsae lij haenh gou ne!” Gij gejnaeuz gou mbouj miz saek di yungh. “Mbouj dwg? Mwngz di bajheiq neix gou lij yawj mbouj ok ha!” Daxmeh yienh’ok cungj yiengh ndawsim mizdaej ndeu.

Gou gig vei, caen dwg boux ngoemx gwn vuengzlienz—— miz haemz gangj mbouj ok ha! “Neix…… neix dwg cozyez Cangh lauxsae nda hawj, mbouj saenq mwngz cam Cangh lauxsae!” Gou mbouj guenj baenz lai, sim siengj seizneix hix cijmiz Cangh lauxsae cij bang ndaej gou lo. Mbouj liuh daengz, coenz vah neix couh lumj gwnz feiz rwed youz nei, gij hozndat daxmeh sikhaek couh lumj feiz dawz nei hwnjfoedfoed lo: “Gijmaz? Dwg Cangh lauxsae heuh mwngz gangj mwngz cij gangj? Nanzdauh mwngz couh mbouj ndaej caensim doiq meh mwngz gangj ‘gou gyaez mwngz’ ha? Mwngz rox gamjaen lwi? Daj iq daengz hung, gou vih mwngz guh geijlai saeh, sai geijlai simgei goengrengz, mwngz caensim doiq gou gangj coenz ‘gou gyaez mwngz’ mbouj ndaej ha?” Vah daxmeh lumj fwnraq nei daemjnaj rwed roengzdaeuj, gou yaek dingj mbouj ndaej lo, “Meh, gou gyaez mwngz! Gou dwg caensim bw!” “Hw!” “Meh, gou dwg caen gyaez mwngz!” “Gou mbouj citgeiz! Gangj ndaej ndei mboujyawz guh ndaej ndei, mwngz dawz ok di hengzdoengh daeuj, gaij gij mbouj ndei mwngz bae, hawj gou noix causim di couh ndaej lo!” Gangj sat, daxmeh baenq ndang byaij bae lo.

Doeklaeng dwg yienghneix caen liuh mbouj daengz ha! Gou gyaengjgywt ndwn dwk, gvaq haujlai nanz, cij hoiz saenz gvaqdaeuj. Ai, meh ha, lwg mwngz bakngawz neix youh aeu saeh ndei banh baenz saeh rwix lo. Hoeng, gou baujcingq, itdingh yungh saedsaeh hengzdoengh daeuj yiengq mwngz cingqmingz: Gou, dwg caensim gyaez mwngz!

(seiq nienzgaep Ciz Swjsui)