Saedceij gyajgeiz dwg gou ceiq gyaez, aenvih ciengzseiz ndaej ginglig mbangj saeh nanz- lumz ndeu. Miz bi ndeu, gou youq lajmbanj ranz daiq youq geij ngoenz, geij ngoenz de louz hawj gou haujlai dauqngeix gyaeundei.

Lajmbanj mbouj miz guenj- dau meizgi, ranz daiq itcig dwg aeu fwnz daeuj cawj haeux. Ngoenzde, daxboh caeuq gou caeuxcaeux couh okdou, bae ndaw bya aeu fwnz, swnhbienh mbaet di mak- dumh ndaw bya. Byaij yaep ndeu le, gou raen henz loh miz nye faex ndeu, couh gip hwnjdaeuj.

“Gaej aeu faex neix, Loz- cangh, cungj nye faex neix coemh hwnjdaeuj hoenzngaungau.” Dax- boh gienq gou cuengq nye faex ndaw fwngz gou roengzdaeuj. “Gip di fwnz ndeu lij iugouz baenzlai ha?” Gou damzboedboed naeuz.

“Dangyienz lo. Mwngz yawj, cungj nye faex ndaem neix, baihgwnz maj miz raet. Raet miz danbwzciz lai, dawz feiz le miz cungj feih haenq ndeu. Ndigah, raeuz yaek gip nye faex saek damh haenx.” Daxboh lumj boux goh- yozgyah nei gej naeuz.

Couh yienghneix, dou it loh byaij, it loh gangjgoj, it loh gip fwnz, doeklaeng gip ndaej rap fwnz naekgywd ndeu.

“Bae, raeuz bae ra mak- dumh.” Daxboh gig miz yinxdaeuz dwk naeuz.

“Ndei lai lo. Gou senqsi couh youq gwnz saw raen gvaq mak- dumh ndaw bya lo, hoeng mbouj caenda raen gvaq, hix mbouj gwn gvaq.” Gou doq gangj doq myaiz rih.

Dou daeujdaengz baihnaj caz oen ndeu, sam aen makdumh youq mbawheu dak lajde daegbied yienhda. Song aen ndinghoengz, aen ndeu mbouj nding geijlai, lumj duhbap nei hung. Gou doq mbaet aen ndeu cuengq haeuj bak bae. W, van lai bw! Lij miz di soemj ndeu. Caen mbouj siengj daengz, cungj makcwx neix feihdauh baenzneix daegbied. Lij dwg daxboh miz gingniemh! De aeu gaiq faex ndeu daeuj viq caz oen, mbouj siengj daengz, ndaw caz oen ndoj miz haujlai makdumh. Gou siujsim iet fwngz haeuj ndaw bae, mbaet aen ndeu gwn aen ndeu. Soemjsoemj vanvan, saedcaih ndeigwn lai lo. Laxlawz neix couh dwg feih makdumh ndaw bya, neix couh dwg feihdauh lajmbanj.

Dou cang rim dauqma. Dungx gou gaenq iek ndaej hemqgugu lo. Gou gyae’gyae couh yawjraen conghheuq ranz daiq hoenz hwnj neuneu, mup daengz feihfaex dawz feiz fat okdaeuj haenx caeuq feihbyaek homfwdfwd dax- daiq cawj haenx. Gwn haeuxbyaek daxdaiq cawj haenx caeuq mak- dumh gou mbaet haenx, ndawsim mbouj rox geijlai van ha.

Neix couh dwg feihdauh lajmbanj, feihdauh ndaw singz ra mbouj daengz haenx.

(Cezgyangh Hangzcouh Si Vwnzhaij Sizyen Siujyoz seiq nienzgaep Seh Lozcangh)