187. Cam:

Duz maz caen leihhaih,

Bae ndaw haij caep fai?

Duz maz goj leihhaih,

Bae gwnz ciengz hoenxciengq?

Hoiz:

Byaleix caen leihhaih,

Bae ndaw haij caep fai,

Duzbeih goj leihhaih,

Bae gwnz ciengz hoenxciengq.

188. Cam:

Duz maz ndaeng mbouj naj,

Ndonj gvaq laj congh rin?

Duz maz fwed mbouj din,

Mbin gvaq raemx fwdfwd?

Hoiz:

Duzndwen ndaeng mbouj naj,

Ndonj gvaq laj congh rin,

Duzbing fwed mbouj din,

Mbin gvaq raemx fwdfwd.

189. Cam:

Gou cam mwngz beix ha,

Gaiq maz rin rox gangj?

Gou cam mwngz beix ha,

Gaiq maz vanj rox luenz?

Hoiz:

Vunz daemj baengz lihlinz,

Gaiq de rin rox gangj,

Ronghndwen hwnj gyang mbanj,

Gaiq de vanj rox luenz.

190. Cam:

Gou cam mwngz beix ha,

Gaiq maz naek gvaq rin?

Gou cam mwngz beix ha,

Gaiq maz nding gvaq lwed?

Hoiz:

Gou naeuz mwngz nuengx ha,

Cihsaw naek gvaq rin,

Gou naeuz mwngz nuengx ha,

Fouq doiq nding gvaq lwed.

191. Cam:

Duz maz caen luhliz,

Diemj feiz gvaq haenz rij?

Duz maz goj lujliq,

Ndaej byoq biq baenz hwnz?

Hoiz:

Ronghrib caen luhliz,

Diemj feiz gvaq haenz rij,

Daekdaeq goj lujliq,

Ndaej byoq biq baenz hwnz.

192. Cam:

Gou cam mwngz beix ha,

Gaiq maz rongh boux laj?

Beix naengh rox cix hix,

Va maz hai bingz deih?

Hoiz:

Aen daeng goq nuengx ha,

Gaiq de rongh boux laj,

Aen vanj hoemj guhyaz,

Va gva hai bingz deih.

（sat）