Banhaemh ngoenz singhgiz ndeu, dahcej daegdaengq ganj cib geij leix loh, soengq geij gaen maenzfaex daeuj hawj gou. Gou boux dog gwn mbouj liux baenzneix lai, youh lau doiq mbouj gvaq dahcej faenh cingz neix, couh dawz maenzfaex cawj liux, caiq heuh geij dahnuengx doengzcaez daeuj guhdoih baen gwn.

“Va, youq gizlawz cawx gij maenzfaex neix, youh unq youh rang, caen ndeigwn o”. Dingqnyi gyoengq dahnuengx mboujdingz dwk haenh maenzfaex ndeigwn, ndawsim gou faengzfwd mboujbingz.

Haujlai bi gaxgonq, gou caeuq dahcej caemh youq aen vat meizgvang giz dieg fwz he guhhong. Dou cix caemh youq baiz ranz youh gaeuq youh daemq ndeu. Hong vat meizgvang gig haemzhoj, souhaeuj ca mbouj gangj, cawx byaek cawx haeux lij aeu gwih danci daengz aen haw gyae ndeu bae. Baedauq gig mbouj fuengbienh. Engq mbouj gangj miz mak roxnaeuz bingj daengj gij doxgaiq neix gwn lo. Dahcej dwg boux vunz gaenx gwn mbaet yungh, rox gvaq saedceij he, lajmbanj miz gij lwg- maenz、 maenzfaex lai dangqmaz, geij maenz ngaenz couh cawx ndaej haujlai daeh lo. Dahcej couh ging- ciengz cawx lwgmaenz、maenzfaex louz youq ranz, seizlawz ndaejhoengq le couh cawj daengx rek rim bae, heuh gyoengq beixnuengx dungxiek najheu haenx itheij yw gvij. Moix daengz seizneix, gyoengqdou couh humx naengh youq ndaek rinhung dangqnaj ranz he gangjriu byoqfeiz, doxciengj haeb gwn lwgmaenz, lumj lwgmaenz dwg doxgaiq lajmbwn ceiq ndeigwn nei, gijmaz simnyap couh vut gvaq raeblaeng bae liux.

Dahcej dinfwngz gig lingzleih, maenzliengz、 lauxbaeg、 gvaheu geij cungj byaek neix mbouj ndeigwn, hoeng ginggvaq de yungh diemz、 soemj、van geij cungj boiqliuh gyagoeng, yaepyet couh bienqbaenz gij doxgaiq soemjvan ndeigwn haenx lo, dawz daeuj soengq haeux gig mizfeih, hawj dou saedceij bienq ndaej gvaqyinx youh mbouj mbwq lo.

Dahcej ciengzseiz maij gangjgoj, fajnaj cungj dwg riunyumnyum, gij- maz haemzhoj nyapnyuk lumjnaeuz cungj haep mbouj ndaej de, de gingciengz angqfwgfwg hix hawj dou simhai, daiq daeuj vaiqvued, hawj dou youq gij ndwenngoenz haemzhoj youh yawj mbouj raen hamq seiz miz rengz caeuq miz sim laebdaeb byaij baenaj.

Guh vunz youq lajmbwn, lainoix cungj miz geij boux baengzyoux. Dahcej doiq gou daeuj gangj, suenq dwg baengzyoux lwgmaenz, dou itheij ginglig gij ndwenngoenz haemzhoj haenx, hawj dou rox gvaq saedceij mbouj yungzheih, gyo’mbaiq、 insik sojmiz doxgaiq seizneix. Gij cingz- ngeih dou cij miz didi he, hoeng caensim caen’eiq. Gij baengzyoux neix, mboujmiz cienzcaiz gvanhaeh, mbouj faen diegvih sang daemq, baedauq mboujmiz gijmaz seisim, mboujmiz ngaenzcienz baedauq, mbouj lau de guhgyaj yaeuhvunz. Gaenj aeu seiz de couh daeuj, mbouj heuh de couh youq henz mbouj guh- sing, moix baez ngeix daengz gij neix, cungj hawj vunz sim’onj youh raeuj- rub.