Gaxgonq gag guh doxgaiq guhcaemz caeuq gij guhcaemz dahniq, ca mbouj geijlai cungj caeuq gij fongnyib daemjbaengz siuqva caeuq lienh guh hongsaeh ndaw ranz gyoengq- de mizgven. Bingzseiz gangj youq ndaw guhcaemz son’gyauq, cingq ndaej yienghneix gangj. Hoeng neix mbouj dwg gocwngz son- gyauq ndaw hagdangz, cix dwg seizgonq youq ndaw ranz gag baenz yienghneix.

Gou haj bi daj Daizvanh riengz bohmeh bae Bwzbingz, seiziq dwg youq baekfueng daluz majhung, gaenq dwg cibcuk dahniq baekfueng lo. Gou nyienh’eiq daj ndaw ndaej- geiq ra ok gij guhcaemz seiziq gou、gij doxgaiq guhcaemz gou caeuq saedceij gou bae le gaenq mboujcaiq dauqma haenx.

Aeu mae geuj faengx, dwg seizgonq ngux nyied co’ngux dahniq baekfueng aeu mae daeuj guh doxgaiq guhcaemz haenx. Aeu ceij geng guh yiengh aen faengx ndeu gonq, yienzhaeuh aeu gak saek mae geuj aen faengx. Boiq saek dwg gou ceiq gyaez guh, gou siengj boiq saek maz couh boiq saek maz. Faengx geuj ndaej le, baihlaj guh foh hwnjbae, hix ndaej roix geij naed caw hwnjbae, caih swhgeij siengj guh maz couh guh maz. Geuj faengx dwg youq ngux nyied co’ngux haujlai ngoenz gaxgonq couh hainduj guh lo, daengz ngoenz co’ngux caeux couh guh ndei, mizmbangj soengq vunz, mizmbangj louz swhgeij venj hwnjdaeuj. Doengzseiz guh haenx lij miz bauhom, aeu gaiq baengznding iq raed baenz yiengh hozloz、lingzhingz、fuenghingz, nyib baenz bau iq, baihndaw cang di liuhhom. Roix hwnjdaeuj gya aen faengx iq ndeu, venj youq gwnz daep daeuxbuh, byaij bae byaij dauq, ndeiyawj dangqmaz. Cawzliux geuj faengx, hix lij ndaej aeu maeyungz geuj youq gwnz aen canghnauj. Gyonj daeuj gangj, yienghyiengh cungj baenz yisuzbinj.

Naedcaw, hix dwg doxgaiq guhcaemz gag guh dahniq gyaez haenx. Roix naedcaw giem miz gij yunghcawq mehmbwk hag guh doxgaiq cang haenx. Gou yungh gij fap roix naedcaw gou geiq ndaej haenx, roix le fouq haebfwngz、soijrwz、goenhfwngz ndeu, couh suenq gij cozbinj gou roek bi haenx ba!

(daj《Gaiq Guhcaemz Seiqiq Gou》genj aeu, Bwzgingh Lijgungh Dayoz Cuzbanj Se, daezmoeg dwg bouxbien gag an)