Mwh gou lij iq, couh dwg seiqcib lai bi gonq, ngux nyied co’ngux mbanj gou gvaq ndaej gig hoenghhwd: Cejdaih gou ndwen gonq couh guh “gyaeuj guk”, bwh ngoenzde hawj lwgnyez ranz bonjfaenh caeuq lwgnyez caencik raek. Boux hujgeiq ndaw diemq nyumxbaengz Ciz Gvanh, gyanghaet ngux nyied co’ngux nyaengq dwk cauh- guh giemqyiengfuz: Bae ndaw daemz mbaet haujlai mbaw yiengfuz daeuj, genj aeu mbaw ceiq lumj faggiemq, gya gaenqgiemq, bwh mwh daengngoenz cingq caeuq mbawdauz caez venj youq gwnz mbonq moix boux vunz.

Meh gou ne, nyaengq guh “hoenzgyaep- nyungz” caeuq gaeb duz gyau: Bae diemqyw cawx bau canghsuz begcij hung ndeu daeuj, cuengq haeuj ndaw lozfeiz bae, hawj de fat ok heiqhom, dawz haeuj moix aen rug bae oenq. Doengzseiz, cawx haujlai gyaeqgaeq daeuj, youq gwnz moix aen gyaeq mbongq aen congh ndeu, cuengq duz gyau ndeu haeujbae, yungh ceij dawz congh fung ndeu, dawz gyaeq cuengq gwnz lozfeiz oenq nyungz haenx bingj. Bingj cug le, mbiq byak gyaeq, dawz duz gyau bae, aeu gyaeq hawj lwgnyez gwn.

Daengz banngaiz daengngoenz cingq, youh dawz bau yungzvuengz ndeu cuengq haeuj vanj laeuj Sauhingh ndeu bae, gyaux yinz le, heuh Ciz Gvanh dawz daengz moix aen rug gungxgok bae, aeu bak daeuj byoq. Laeujyungzvuengz lw gij giek haenx, aeu lwgfwngz yub aeu, youq moix aen dou sij cih vuengz; youh aeu fwngz vax aeu di oet haeuj ndaw saejndw moix boux lwgnyez bae. Gawq gangj, gyaeuj guk、mbawdauz、 giemqyiengfuz ndaej gyaep sezheiq; duz gyau bingj gyaeq ndaej siu bingh; canghsuz begcij caeuq yungzvuengz ndaej gyaep cawz nondoeg caeuq heiqdoeg. Gangjdaengz cih vuengz gwnz dou ne, gawq gangj dwg bwh guh ywsiudoeg yungh: Ngoenzlaeng danghnaeuz miz vunz deng sipndangj ngwzdoeg haeb le, ndaej youq gwnz dou gvet aeu di daeuj oep, couh sikhaek siudoeg dingzin.

Ndawbiengz ciengz bienq, seizneix cungj guhfap geqlaux neix gaenq mbouj lai raen, duenngux guhfap haenx gaenq dwg seizgonq mbouj beij ndaej ngoenzneix lo. Cih vuengz gwnz dou gou dandog geiq haenx, cix dwg vihliux cang veh gwnz dou.

(daj《Fungh Swjgaij Sanjvwnz》genj aeu, Yinzminz Vwnzyoz Cuzbanj Se)