Ngux nyied co’ngux, dwg ciet duenngux, dwg ciet lauxgeq Cunghvaz Minzcuz ndawde aen ndeu, daengz seizneix gaenq miz 2000 lai bi lizsij, caeuq ndwencieng、cingmingz、bet nyied cibngux, caez heuhguh seiq daih ciet conzdungj ndawbiengz Cungguek.

Ciet duenngux miz coh’wnq yaek daengz 30 aen, gij coh’wnq neix miz ciet duenyiengz、ciet cungzngux、ciet nguxnyied、ciet ngoenzngux、ciet yiengfuz、ciet lwgsau、ciet ruzlungz、ciet ngoenzlungz、ciet faengx daengjdaengj. Seizneix daeuj gangjgangj geij aen coh’wnq ngux nyied co’ngux baenzlawz mizok.

Ciet duenngux. Cih “duen” Sawgun miz gij eiqsei hainduj, ndigah “duenngux” couh dwg “co’ngux”. Ciuq ligfap, ngux nyied cingq dwg ndwen “ngux（午）”, ndigah “duenngux（端五）” couh ciemhciemh bienq- baenz “duenngux（端午） lo.

Ciet duenyiengz. Gawq《Cinghcuj Suiseiz Geiq》geiq miz, aenvih seizhah daihngeih ndwen dwg binsang, yiengzheiq swnghwnj, ngux nyied cingq dwg seizhah daihngeih ndwen, daih’it aen ngoenzngux cingq dwg saedceij ndei binsang, ndigah heuh ngux nyied co’ngux guh “ciet duenyiengz”.

Ciet cungzngux. “Ngux（午）”, dwg cibngeih dicih, liggaeuq ngux nyied dwg ndwen ngux（午）, ngux（五） caeuq ngux（午） doengz yaem, ndigah ciet duenngux youh heuh “ciet cungzngux（五）” roxnaeuz “ciet cungzngux（午）”, mizmbangj dieg hix heuh “ciet ndwenngux”.

Ciet yiengfuz. Ciet duenngux hix dwg ciet “siu bingh re bingh”. Vunz ciuhgeq nyinhnaeuz “cungz- ngux” dwg ngoenz famh gimqgeih, seizde haj doeg okdaeuj, ndigah fungsug duenngux lai guh gyaep sez ndoj doeg, lumj gwnz dou venj yiengfuz、mbaw’ngaih daengj, ndigah ciet duenngux hix heuh “ciet yiengfuz”.

(Lu Mingz)