Banngaiz, gou youq ranz daxdaiq sij cozyez.

Sij daengz dingz ndeu, yawj coh rog cueng, mbouj miz daengngoenz, mbwn raemhrwd, gig hab okbae guhcaemz. Gou buet ok ranz bae, ya, sawqmwh daengngoenz nding’yanyan okdaeuj lo, venj youq gyangmbwn ronghsagsag, da cungj hai mbouj ndaej. Mbat neix baenzlawz guhcaemz lo? Mbouj guhcaemz lo, gou mbouj siengj deng ndit dak ndaej mdaemndat! Baenq ndang gvaqdaeuj, buet haeuj ranz bae. Dawz bonj cozyez okdaeuj, youh yawj coh rog cueng. Yi, daengngoenz youh mbouj miz lo, gwnzmbwn youh raemhcubcub. Yawjdaeuj aen daengngoenz neix lij gig rox simgei gou. Ndwn hwnjdaeuj, sou cozyez, caiq baez iet gyaeuj okbae, yi, lij caengz ok dou, daengngoenz baenzlawz youh okdaeuj lone, gijmaz eiqsei ma! Daeuq gou ha? Siengj hawj gou youq ranz sij cozyez couh gangj cingcuj, hawj gou buet bae buet dauq mbouj baeg ha? Gou hozndat lo: “Daengngoenz dwgcaengz, danghnaeuz mwngz mbouj hawj gou okbae guhcaemz ne, gou couh doiq mwngz mbouj hekheiq lo, gou yaek……” Couh yienghneix, gou itcig doiq daengngoenz naeuz gij mbouj hab’eiq gou. Daengngoenz caen geizheih, yaep ndeu okdaeuj, yaep ndeu youh dauqbae, lumjdwg naeuz: “Mbouj dingq mbouj dingq, couh mbouj dingq, mwngz ndaej dawz gou guh lawz lo?” Mwhde gou huj lo, gig siengj hwnjbae moeb de donq ndeu. Hoeng, mbouj miz aen lae baenzhaenx sang ya, baenzlawz guh ne? Cijndaej danq gaemz heiq ndeu, youh naengh roengzdaeuj sij cozyez lo.

Caen dwg aen daengngoenz dwgcaengz ndeu.

(Gveicouh Swngj Gveiyangz Si Sizfungh Yen Yungjcing Siujyoz sam nienzgaep Lij Swjhwngz)