Ngoenz ndeu cuengqhag, gou cingq sousib daehsaw, mbouj siujsim, bonj cozyez ndeu doek roengz dieg bae.

Gou ngamq yaek siengj gip aeu, doengzdaiz gou mbouj siujsim caij bonj cozyez gou lo. Raen yienghneix, gou sawqmwh hozndat lo, fok de naeuz: “Ae, mwngz mbouj miz da ha? Cungj caij bonj cozyez gou uq lo!” De ngaem gyaeuj yawj bonj cozyez laj din de, boizleix naeuz: “Caen dwg daiq doiq mbouj gvaq lo!” Gou dingq gij vah de le, engq hozndat lo, gou doiq de naeuz: “Mwngz laihnaeuz gangj sing doiq mbouj gvaq couh ndaej ha? Mwngz boiz gou!” De raen gou mbouj ei mbouj nyiuz, hix hozndat lo, gyaeuj baez niuj, naeuz: “Boiz couh boiz, miz maz liux mbouj hwnj lo!”

Ma ranz le, daxmeh raen gou simcingz mbouj ndei, cam gou ok maz saeh. Gou aeu saehcingz mwh cuengqhag fatseng haenx lwnh hawj daxmeh nyi. Daxmeh dingq le, sonyinx gou naeuz: “Neix couh dwg mwngz mbouj deng lo. Daih’it, de dwg mbouj siujsim caij bonj cozyez mwngz; daihngeih, de gaenq caeuq mwngz boizleix lo, mwngz wnggai yienzliengh de. Doiq vunz yaek rox lijgaij caeuq nyiuz vunz.” Dingq daxmeh yienghneix gangj le, gou caemdingh roengzdaeuj, siengjsiengj saedcaih dwg gou mbouj deng, gou gietdingh ngoenzcog caeuq de nyinhloek.

Ngoenz daihngeih gyanghaet, gou haeuj gyausiz, raen doengzdaiz gou gaenq daeuj lo. Caengz caj gou naengh roengz, de hai bak gonq lo: “Caen doiq mbouj gvaq, neix dwg cozyez gou boiz mwngz.” Gangj le couh dawz cozyez ndenq hawj gou. Gou gipmuengz doi gvaqbae, naeuz: “Doiq mbouj gvaq, ngoenzlwenz dwg gou mbouj deng. Mwngz mbouj dwg daegdaengq caij cozyez gou, gou mbouj wnggai mbouj gangj dauhleix, cingj mwngz yienzliengh!” Doengzdaiz yawjyawj gou, raen gou dwg caensim boizleix, couh gangjriu naeuz: “Vunz hung mbouj geiq loek vunz iq, gienh saeh neix gvaqbae lo, gou yienzliengh mwngz lo. Haha——” Raen de riu le, gou hix hehe riu lo.

Aenvih bonj cozyez yinxhwnj ciengz doxceng ndeu, hoeng ciengz doxceng neix hawj gou caeuq doengzdaiz gou gvanhaeh engq doxndei、doxngamj lo.

(Gyanghsuh Swngj Suhcouh Si Gauhsinh Gih Swhsanh Sizyen Siujyoz Yiz Haucwz)