Dahnuengx gou bi neix haj bi lo, de youq Cindungh Youwzyenz doeg siujban, coh de heuh Sinj Lozciz.

Gou daeuj lwnh mwngz, coh dahnuengx dwg baenzlawz daeuj. “Sinj” dwg singq daxmeh, dahnuengx riengz singq daxmeh, ndigah couh singq “Sinj” lo; “loz” Sawgun dwg angqyangz, dwg daxboh maqmuengh de ngoenzngoenz cungj angqyangz; “ciz”, caeuq coh gou cih doeklaeng ityiengh, maqmuengh de hix bungz daengz boux vunz miz daekcaiz couh siengj caeuq de bingzciz(caez).

Dahnuengx naj luenzlulu, vunz mbouj suenq sang, lwgda hunghat, bwndaraemx gig raez, de louz byoemgyaeuj lumj duj raet nei, dwggyaez dangqmaz.

Dahnuengx simvuen vuedbued, gij yinx de gig lai. De gig gyaez guhcaemz daeb lozgauh, hix gyaez veh veh, yaep ndeu nyaengq gijneix, yaep he nyaengq gijhaenx. Ndigah, gou ciengzseiz roxnyinh ndang de youq miz sam boux vunz, faenbied dwg: Dah vunz guhcaemz ndeu、dah vunz yawj densi ndeu、dah vunz hagsib ndeu. Sam dah vunz neix moix ngoenz cungj doxhoenx, byawz hingz, byawz couh hawj dahnuengx guh gij saeh byawz. Mwngz yawj, ngoenzneix couh yiengh- neix——

Banringz, gou cuengqhag ma ranz, ngamq haeuj ranz, dahnuengx couh buet gvaqdaeuj naeuz: “Go go, gou yaek yawj densi!” Youq gou yawjdaeuj, seizneix ndaw ndang dahnuengx dah vunz yawj densi hingz lo. Yienghneix gou hai densi hawj de, densi boq gij dungvaben de gyaez yawj haenx.

Dangyienz, dahnuengx hix gyaez yawj saw. De gingciengz yawj bonj saw《Gunghcuj Byoem Raez》neix, ceiq gyaez gunghcuj Lozbei ndaw saw.《Geizyienz Naesiet》hix gyaez mbouj sij cuengq, lij gingciengz cang’yienj Aisah roxnaeuz Anhnaz gunghcuj ndaw saw.

Dahnuengx lij gig gyaez hagsib, riengz gwnz muengx hag Yinghyij, seizneix, de gaenq hag rox Yinghyij “tiger” dwg duz guk, “rabbit” dwg duz douq, “lion” dwg saeceij …… Va, dahnuengx gou ak lai lo!

Sou yawj, neix couh dwg dahnuengx ranz gou gyaez guhcaemz、gyaez yawj saw, youh gyaez hagsib haenx, vunz ranz gou cungj gig gyaez de.

(Cezgyangh Swngj Dungzyangh Si Dungzyangh Sizyen Yozyau Houz Sinjciz)