Banhaemh ndawsingz nauh- nauh yiedyied, hoeng banhaemh lajmbanj dwg caemdingh、cwxcaih.

Mwngz yawj, daengngoenz menhmenh doek roengz bya bae lo. Gwnzmbwn aen mbanj gofaex raemhrwd haenx swng hwnj caengz hoenz mbang he, caen lungj caengz sa mbang he hoemq dawz daengx aen mbanj nei. Ndaw ndoengcuk miz sing cici caca hemq, laxlawz dwg gyoengq roeg cingq caenhcingz ciengqgo. Yienznaeuz gou dingq mbouj rox gyoengqde ciengq gijmaz, hoeng gou rox gyoengqde simcingz itdingh dwg angqyangz.

Gou caeuq daxmeh doxcaez bae reihbyaek aeu byaek. Youq gwnz loh, gou yawjraen bang lwgnyez ndeu buet bae buet dauq guh’angq. Gyoengqde itmienh guh- angq itmienh byaij ma ranz, dwg yienghhaenx gvaigvet dwggyaez. Mokhoenz lumjdwg youh mbin daengz doenghnaz heusausau nei, gomeg heusausau、 va’byaekyouz- caiq henjrwgrwg, lumjbaenz cungj deng hoemq caengz sa hau mbang ndeu, gingjsaek caen gyaeundei ha! Gyoengqvunz youq ndaw naz guhhong laebdaeb byaij ok naz daeuj, youq gwnz loh iq byaij ma ranz. Gyoengqde miz mbangj lohdin, miz mbangj duq vaiz, duz vaiz rieng de baez fid baez fid, fid aen ndang naekgywd de, menh- yedyed byaij bae naj, sing hat bouxcawj caeuq sing vaiz hemq- momo rwenz youq gyang doenghnaz. Mbouj rox seizlawz, daxmeh gaenq byaij gyae lo, gou ganjvaiq gyaep hwnjbae, daxmeh naeuz: “Gizgiz, mwngz dwg mbouj dwg deng gingjsaek banhaemh gyaeundei neix maez dawz lo?” Gou riu dwk ngaekngaek gyaeuj.

Mbwn haeuj haemh lo, gou caeuq daxmeh riuj swx byaek ma daengz naj ranz. Gwnzmbwn naj ranz hoenzfeiz hwnjneuneu, seiz mbouj seiz dingqnyi sing dungvaben daegnuengx ranznden boq haenx. Raq rumz ndeu ci gvaqdaeuj, ndaw rumz daiq daeuj feihhom nohlab, gou lumjdwg youq ndaw vuengzguek gojlwgnyez ninzloq nei……

(Gyanghsih Swngj Bingz- yangh Si Luzhih Yen Cangh- gyahfangj Yozyau haj nienzgaep Nez Yizgiz)