Seizcin ndaw ndoenglaep, dah iq laecoco, song hamq dah bu rim nywj iq heuyauyau. Gwnz diegnywj, duj vameizgveiq ndeu dinghdingh ndwn dwk. De dwg baenzneix gyaeundei, nding ndaej beij lwed lij nding. Gyae- gyae yawj bae, hawj vunz mbat ndeu couh yawj raen de. Byaij gyawj de, raq vahom ndeu iemq haeuj sim vunz bae, hawj vunz nyaenx mbouj ndaej haeujmaez.

Vameizgveiq roxnyinh swhgeij daegbied gyaeundei, doenghduz iq henz de cungj daegbied maij de, lienz guekvuengz duzguk cungj buet daeuj ngonzyawj de, haenh de gyaeundei. De ndaengmoj lo, dawsim siengj: Cijmiz yienghceij gou baenzneix gyaeundei cij hawj daihgya haenh gou gyaez gou.

Miz ngoenz ndeu, ndaw ndoeng- faex mbin daeuj duz roegdingfaex ndeu. De maj ndaej gig itbuen, fwed de ndaem hau mbouj miz gij saek ndeiyawj daeuj cang de, yawj hwnjbae mongmwtmwt. Roegdingfaex mbin haeuj ndaw ndoengfaex, daengz go faex neix dingqdingq, daengz gofaex haenx dotdot, yawj hwnjbae de gig nyaengq. Vameizgveiq daj ndawsim yawj mbouj hwnj boux ranznden yakyawj neix, de ngiengx gyaeuj dasang cam naeuz:“Duz roeg yakyawj neix, mwngz caeuq gou beij byawz engq gyaeundei?” Roegdingfaex sik- haek han naeuz:“Dangyienz dwg mwngz engq gyaeundei lo!” Vameiz- gveiq dingq le gok bak baez mbe, ndawsim siengj: Hw, suenq mwngz miz da!

Cin bae cou daeuj, faex hung ndaw ndoengfaex cungj bingh lo. Gyoengqde bouxboux naiqnuknuk, mbaw rozhenj, loenq roengz- byoegbyoeg. Roegdingfaex daj gizgyae mbin ma ndaw ndoengfaex, de yaek daeuj gouq gij baengzyoux hung neix. De mbin daengz gwnz ndang go youh go faex hung bae, ngieng rwz dingq, sikhaek couh ra daengz duz non youq gwnz ndang gofaex haenx. “Doek doek doek”, song sam mbat couh dot hai congh faex, dot ok duznon daeuj. Roegdingfaex mbin bae mbin dauq nyaengq mbouj dingz, vih baengzyoux deng bingh haenx yw ndei bingh lo, gyoengq faex hung sikhaek couh roxnyinh ndangdaej soengswt, gogo faex riu dwk gyo’mbaiq roegdingfaex.

Vameizgveiq da raen gij ginggvaq roegdingfaex bang faex hung yw bingh, de cij rox duz ranznden maj ndaej bingzciengz haenx dwg geijlai hung- mbwk. De aeu hengzdoengh saedcaih bang bouxwnq, mbouj beij de boux maj ndaej gyaeu hawj vunz gyaez neix gung’yen noix. Siengj daengz gijneix, vameizgveiq gietdingh, itdingh yaek gyau roegdingfaex boux baengzyoux neix!

(Suhcouh Si Gauhsinh Gih Cwngzda Sizyen Yozyau Sung Yijsinh)