Ngoenzneix, mbwn gvengq ndit rongh, daxmeh soengq gou bae hagdangz.

Gou raek hungzlingjginh nding’yanyan byaij bae coh hagdangz. Sawqmwh baihnaj lwenqda dangqmaz—— Youq ndaw naz diuz loh van gvaqbae haenx, miz benq valwgbaenq ndeu. Gou dingz roengzdaeuj yawjngonz gyoengqde: Geh mbaw heuyau, gizneix ndonj ok duj valwgbaenq saeklamz ndeu, gizhaenx ndonj ok duj valwg- baenq saekmaeq ndeu, lij miz valwgbaenq saekgyaemq hix yungh rengz daj ndaw geh mbaw caenx okdaeuj, gak saek gak yiengh, ndeiyawj dangqmaz. Gij va neix miz mbangj hai ndaej cingq hoengh, lumj haenqrengz ci ok aen lozlez iq ndeu; miz mbangj lij dwg aen valup yaek hai, limq vaq launyaenq dwk comzgyonj youq doxcaez, baih- ndaw lumjbaenz yo miz duz vasien nei; lij miz haenx dwg valup iqet baihrog suk miz buhheu, oiqetet, de miz cungj senggei caeuq rengz yungh mbouj caenh ndeu.

Itdingh dwg haemhlwenz gyanghwnz, raemxraiz lij caengz ndaej gib ma ranz, miz mbangj ninz youq gyang mbaw valwg- baenq heuyauyau haenx, miz mbangj ndoj youq ndaw sim valwgbaenq…… Baenz naed baenz naed raemxraiz youq daengngoenz ciuq lajde, daegbied ronghcingx, lumj naed caw luenzraeuz nei, cang valwgbaenq ndaej engqgya gyaeundei lo.

“Dahcing vaiq di byaij, baehag yaek ceiz lo!” Daxmeh coi gou lo, gou sij mbouj ndaej biek valwgbaenq bae, buet bae coh hagdangz……

(Sanjsih Swngj Sanghloz Si Yangzgujhoz Cin Goujbicaeq Yozyau Siujyoz Bu Vangz Cingyuz)