Roegenq mbin bae, lij miz seiz dauqma; goliux roz lo, lij miz seiz dauq heu; vadauz loenq lo, lij miz seiz dauq hai. Hoeng, seizlwgnyez, saedceij yienghhaenx gyaeundei baenzlawz bae le couh mbouj caiq dauqma ne? Seizlwgnyez dijbauj dwg bae gyae lo, louz roengz haenx cij dwg gij dauqngeix lingzlingz singsing.

Hoeng gou baez youh baez roq hai aen douhung ndaejgeiq, yawj aen siengq caeux couh bienq henj haenx, ndit dak roengzdaeuj, cim aen naj ndaejgeiq sugsed, gij yiengh beij “ye”, yawj dwk seizgan cingq vaiqvet daj geh fwngz laebae haenx, seiz- lwgyez mbouj ok sing laeglemx byaij bae lo, baez bae neix couh caiq mbouj dauqma.

Baenz aen baenz aen siengq guhcingq rizdin gou majhung, youq gwnz diuz loh majhung, gou louz roengz rizdin genggwt aen youh aen……

Sawqmwh, da gou dingh youq gwnz aen siengq he, haenx dwg gyanghaet ndit ronghsag he, gou caeuq daxmeh cingq youq suen makit mbaet “dahsien iq” gyaemqrongh haenx, gyoengqde cingq angq dwk vadfwngz coh dou. Mbouj geij nanz, dou couh mbaet ndaej swx rim ndeu lo. Gou boux ngah gwn neix, dingj mbouj ndaej lwg nyaemqrongh neix yaeuh, couh caeg gwn aen ndeu, ha! Vansubsub soemjsedsed, caen hawj vunz gwn le lij siengj gwn! Yienz- naeuz saedceij seizlwgnyez neix mbouj miz lo, hoeng ceiqnoix dauqngeix lij miz. Dauqngeix gvaq le, youh yaek laebbaeb byaij diuzloh majhung, louz roengz engqlai rizdin.

Gou siengsaenq simsoh ciengx- lwenx louzyouq, couh lumj gou saenq daenghgo mbaw ndoengq va gyaeu, goekgaenq de dwg daj naedceh genggwt ndaw namh daeuj……

（Gyanghsuh Swngj Suhcouh Gunghyezyenz Gih Singhyangz Yozyau Gauh Yozyenz）