Ndithaemh dak youq naj cueng gou, raq hoengheiq singjsien ndeu coemj haeuj ndaeng daeuj. Mwh gou byaij gyawj, yiengjsouh gij hoengheiq singjsien, aen daengngoenz banhaemh sawj gou doeksaet lo.

Daengngoenz banhaemh nding- yanyan, lumjdwg miz vunz buet youzcaet nding nei, dawz aen mbwn caeuq fwj cungj nyumx nding lo. Gou guj, gij youzcaet neix itdingh dwg daengngoenz banhaemh buet. Daeng- ngoenz banhaemh lumj rox dwg swhgeij “loek” lo, launyaenq dwk ndoj haeuj ndaw fwj bae, hawj bien fwj sieng hwnj gvaengz gim lwenqda ndeu. Mwhde, raq rumz ndeu ci gvaq, dawz fwj ci bae, gaeb daengngoenz ban- haemh laeq diuqbeiz neix okdaeuj lo. Daengngoenz banhaemh raen de mbouj miz dieg ndoj, naj beij aen makbingzgoj lij nding, lumjdwg nyinhloek nei. Gou caen siengj doiq de naeuz:“Daengngoenz banhaemh, mbouj youqgaenj law, mwngz dauqfanj hawj aen mbwn engq gyaeundei lo.”

Daengngoenz banhaemh menh- menh daeujdaengz byaimbwn, yaeng- yaeng dawz ndityawz de saj hawj sojmiz doenghyiengh gwnz daihdeih: De hawj nywj va daenj mauhgim, hawj gofaex daenj buhgim, hawj daihdeih bu couzgim, hawj raeuz aen biengz gyaeundei ndeu. Gou geijlai siengj miz aen daengngoenz banhaemh gyaeundei youh daihfueng ndeu ha!

Nywj va bidoengh aen mauhgim de, gofaex saenq buhgim gwnz ndang de, lumjdwg naeuz:“Daengngoenz banhaemh ha, mwngz couh ciengx- lwenx louz youq byaimbwn ba!”

Daengngoenz banhaemh saenq- saenq aen ndang de, lumjdwg siengj dapwngq, hoeng de dingqnyi aen biengz lingh gyaeuj ndeu, lingh gyoengq doengzdoih de cingq heuh de: “Mwngz vaiq gvaqdaeuj, dwkbyoengq banhwnz youh laep youh caem neix ba!”

Daengngoenz banhaemh danq gaemz heiq ndeu, roengzbae dingz ndeu, dingz baihgwnz cix dingz youq gizde gig nanz. Doeklaeng, de siengj daengz, miz de sojmiz doenghyiengh cij hoenghhwd, de danghnaeuz mbouj roengzbae, lingh mbiengj biengz he couh cij lw gij yiengh fwzfwd caemrwd lo. Daengngoenz banhaemh dawz dingh cawjeiq, menhmenh biek bae, cij louz di ndityawz caeuq sing danqheiq ndeu.

Gou siengj: Danghnaeuz daeng- ngoenz banhaemh ciengxlwenx louz youq byaimbwn, yienghneix geijlai ndei ha! Hoeng gou siengjsiengj le, couh siengj doeng lo, aenvih gou siengsaenq, ngoenzcog gou couh yaek miz aen daengngoenz engq gyaeundei he.

(Gyanghsuh Daicangh Si Siz- yen Siujyoz Liengz Vunghswh)