Daj it nienzgaep hainduj, gou couh miz daegnuengx ndeu buenx gou. Mboujlwnh gou miz gijmaz saeh aeu vunz bang, couhsuenq de bang mbouj ndaej, hix yaek bang gou doxcaez siengj banhfap.

Ngoenz singhgizroek ndeu banringz, daxboh daxmeh cungj okbae lo, cij gou caeuq daegnuengx youq ranz. Mwhde cingq dwg seizhah hwngqndat, gou fatndat gig naek, gaenq ndat daengz 39 doh. Daegnuengx dwk dienhvah hawj daxboh daxmeh le, lij gip ndaej baenqlulu. Gwnz loh, daxboh daxmeh gaenq vaiqvwt ganj ma ranz; ndaw ranz, daegnuengx ganj- gip daek bat raemxcaep ndeu daeuj, cuengq henz ndang gou, aeu fwngz iq de yungh rengz faenj sujbaq, hoeng de mbouj miz maz rengz, faenj mbouj ndaej, cij ndaej daj gwnz daengz laj, dawz raemx sujbaq baez di baez di nyaenj okdaeuj. Daegnuengx ngamq nyaenj ndaej sujbaq, youh sikhaek bae ra yw. De cauq aen gvih, ra daengz le ywdoiqndat, youh haeuj ndaw rug, yungh caenh rengz de fuz gou hwnjdaeuj, bwnq yw hawj gou gwn.

Mbouj geij nanz, daxboh daxmeh cungjsuenq ganj ma daengz ranz lo. Mwhde, daeg- nuengx gaenq hanh rihroenroen lo. Daxboh daxmeh soengq gou bae yihyen daj cimdiuq, mbouj gvaq geijlai nanz, gou couh doiq ndat lo. Neix hix miz goenglauz daeg- nuengx, nuengx, miz mwngz caen ndei.

Mwh yaek gaujsi, aenvih fuzsiz, gou moix ngoenz ninz ndaej gig gvaiz, mwhde hix dwg mwh gou ceiq simnyap. Moix baez, mwh gou fuzsiz ndaetnaiq, daegnuengx cungj daeuj henz gou, buenx gou fuzsiz. Gou doeg gijmaz, de hix riengz doeg gijmaz, couhsuenq de dingq mbouj rox gou doeg maz, de ciuqyiengh hag yiengh gou doeg. Daegnuengx daeuj henz gou, hawj gou hagsib caiq mbouj hohang mbwqmbwt lo.

Bouxwnq cungj naeuz, miz daegnuengx caen fanz; gou cix naeuz, miz daegnuengx ndeu, caen ndei!

(Gyanghsuh Nanzdungh Gauhsinh Gih Siujyoz roek nienzgaep Gu Yingzvei)