149. Goenglaux naengh gwnz cauq,

Nyouh gwq bauqloenloen.

(Ngauz laeuj)

150. Aen vanj youq gyang baq,

Fwn cuengq raq mbouj rim.

(Rongz roeg)

151. Cam:

Duenz mwngz coenz daih’it,

Faex ndip daengj cungqgyang,

Beix rox nuengx couh hoiz,

Faex cungqgyang diuq sienq.

Hoiz:

Duenz gou coenz daih’it,

Faex ndip daengj cungqgyang,

Boux roi gyaeuj doxroengz,

Faex cungqgyang diuq sienq.

152. Cam:

Duenz mwngz coenz daihngeih,

Vamaedlaeh giengh dan,

Beix rox nuengx couh hoiz,

Faex cungqgyang raek hoh.

Hoiz:

Duenz gou coenz daihngeih,

Vamaedlaeh giengh dan,

Vunz daem haeux bibanz,

Faex cungqgyang raek hoh.

153. Cam:

Duenz mwngz coenz daihsam,

Noh ndaw banz fat ndok,

Beix rox nuengx couh hoiz,

Dawh ndaw gyok fat mbaw.

Hoiz:

Cienz ngaenz youq ndaw cang,

Noh ndaw banz fat ndok,

Rongdaij le beix ha,

Dawh ndaw gyok fat mbaw.

（21）