Seizcin daeuj daengz bak va hai,

Rwi mbaj angq lai mbin bae ciuz,

Vunz bungz saehndei hix gag riu,

Caegcaeg eufwen ndawsim angq.

Ciet Sam Nyied Sam Bouxcuengh angq,

Gyoengqvunz simsangj ganj hawfwen,

Gwnz roen seiqcawq byaij mbouj duenh,

Gyoengqde sim vuen caen dahraix.

Gyoengq boux dahsau gvaq henzndang,

Lwgmbauq angqyangz riengz coh naj,

Gyoengqde bouxboux faj naj na,

Eufwen daeuj dongx da youh gaeuj.

Vunzlai doq bae doq doiq fwen,

Ndawsim vuenheij caen dahraix,

Doq bien doq eu bouxboux maij,

Boux dingq gyo’mbaiq youh danqhaenh.

Lij caengz gaijgwz hailangh seiz,

Mbanjmbanj cungj meiz(miz) vwnzyidui,

Bouxcoz angq ndaej lumj gwn oij,

Seizde boux oiq daeuj cienzciep.

Doeklaeng guh gaijgwz hailangh,

Bouxboux angq riu naj lumj va,

Gyoengqvunz gag naemj bae cauhgya,

Gij fwen nanz ra vunz daeuj ciep.

Caeklaiq dangj raeuz caeux roxnyinh,

Heuh raeuz lwgminz guh cienzciep,

Doeng gij lajmbanj gyoengqvunz ndiep,

Ciepswnj mbouj giep bouxgeq haenh.

Cauhlaeb gij ginz veihsin lai,

Caengz rox eufwen maij daeuj hag,

Caez haeuj ndaw ginz bae vaiqlag,

Miz son miz hag vunzlai gyaez.

Lauxsae bien fwen fat ndaw ginz,

Baengzyoux caengz ninz lij angq ciengq,

Eu ndaej miz vunq youh miz yiengh,

Caenhsim yiengjsouh gij angqyangz.

Vwnzva gagsaenq gyoengqraeuz haenq,

Aeu bawx haeuj ranz haengj eufwen,

Gij sing cienz daeuj singsing rwenz,

Lwgnyez hix geng daeuj guhfaenh.

Lajbiengz Mbanjcuengh gyoengq bouxcoz,

Youq ndaw doujyinh boq sing fwen,

Gij sing gyoengqde mbouj itbuen,

Gij fwen Bouxcuengh cienz gyae’gvangq.

Bouxcoz ndaejhoengq hwnj doujyinh,

Swhgeij caensim roengzrengz hag,

Caezcaemh daeuj eu caez vaiqlag,

Lailai damqra yak bienq ak.

Gij vunz ndaejhoengq iu doxcomz,

Bouxak angq daeuj son bouxnyieg,

Yunghsim lai hag mbouj doxbieg,

Cukmaenh giekdaej bae ciepswnj.

Doengh boux okrog bae guhhong,

Gihrwz aet haeuj conghrwz dingq,

Dingq gij sing fwen ingj cingzgingj,

Angq ndaej ringxringx gangj mbouj liux.

Bouxgeq ngoenznaengz haeuj ndaw ginz,

Haeujsim dingq fwen naihsim son,

Baengzyoux hag rox ndawsim vuen,

Caez daeuj eufwen bouxboux angq.

Hagdangz son hag gij fwen lai,

Conzdungj vwnzva hai lai hoengh,

Dangj raeuz haenqrengz daeuj bangcoengh,

Bouxgeq bouxiq cungj angqyangz.

Doengh gij ranz cienz gij sing fwen,

Vunzlai eu ndaej vuenheij lai,

Gyoengqde angq eu daengz mbwn gvaiz,

Eu ndaej mizyinx ngaiz mbouj ngah.

Lajbiengz daengz ciet guh hozdungj,

Vunzlai angq ndaej bae camgya,

Doengzcaez guhdoih bae damqra,

Minzcuz vwnzva ndaej cienzciep.

Sibinz hozdungj cienz bae gyae,

Gyoengqvunz yawjraen gyaez dahraix,

Conzdungj vwnzva vunzlai maij,

Maqmuengh daihdaih cienz ndaej maenh.

Mbouj nanz couh daengz aen hawfwen,

Gyoengqvunz vuenheij seiqcawq daeuj,

Gangjgangj riuriu ndei lai raeuh,

Bouxboux cungj naeuz caen vaiqvued.

Conzdungj vwnzva Bouxcuengh lai,

Gyoengqraeuz wnggai gaenx hungzyangz,

Seizneix ciepswnj rengzbangbang,

Bouxcuengh simsangj fajnaj hai.