Ngoenz doek fwn, daxboh hai ci daiq gou okdou, gou ing youq aen eij baiz baihaeng, yawj coh cuengdingjci.

Va, gou yawjraen haujlai “rug iq”, gyoengqde aen gyaeuj hungyat, rag diuzrieng raezrangrang, youq cuengdingjci youz bae youz dauq. Gyoengqde miz mbangj youz ndaej vaiq, miz mbangj youz ndaej menh, lumj doxdax nei. Sawqmwh, daxboh gyavaiq hai ci lo, gyoengq “rug iq” doxcaez youz coh baihlaeng, duz ndeu, song duz…… Gyoengqde duzduz youz ndaej vaiqvetvet, cungj siengj ceng daih’it.

Mwh daxboh hai ci menh roengzdaeuj, gyoengqde youh cwxcaih guhcaemz lo. Gyoengqde yaep he youz coh baihdoeng, yaep he youz coh baihsae, miz mbangj “rug iq” fwngz gaem fwngz, lumj cingq diuqfoux nei; miz mbangj gag youz baenaj, lumj cingq youzbyaij nei; lij miz mbangj baiz baenz doih, lumj cingq itmienh youz itmienh gangjgoj……

Fwn rog cueng itcig doekbyoegbyoeg, didi dada doek gwnz cuengdingjci, “rug iq” ciemhciemh lai lo, miz mbangj gingqyienz lij majhung dem. Mwhde, gou raen miz mbangj “rug iq” gingqyienz youz daengz gwnz cuengdouci, mizyinx lai lo!

(Hozbwz Swngj Yingzdaiz Si Sinduh Gih Dazhozcenz Siujyoz it nienzgaep Liengz Yindoz)