Ndaw gwndaenj couh lumj aen bingzbakfeih, soemj、van、haemz、manh, yienghyiengh cungj miz. Raeuz cimz haemz ndaw gwndaenj, engq gwn van ndaw gwndaenj.

, yo youq ndaw biujyangz lauxsae. Baezde, lauxsae youq gwnz gyangjdaiz nyinhcaen gangj goq, hoeng laj gyangjdaiz cungj miz sing cici caca, dwgcaengz raixcaix, lauxsae hix ndatheiq ndaej fokdengdeng. Gou lumj gamjsouh daengz gij simcingz lauxsae, couh swnh lauxsae mbouj haeujsim doiq doengzhag henz ndang naeuz: “Gaej gangj lo, lauxsae cungj fatheiq lo.” Hoeng gyoengqde mbouj miz saek boux dingq, neix sawj gou gig huj, aenvih gyoengq doengzhag di ndeu cungj mbouj goq gij gamjsouh lauxsae. Gou yied siengj yied ndatheiq, couh hujdengdeng sing hung hemq naeuz: “Heuh sou gaej gangj vah, nyinhcaen dingq goq mbouj ndaej ha?” Vah gou ngamq dingz, ndaw gyausiz sikhaek caemdingh lo. Gou gig lau, laeglemx yawj lauxsae mbat ndeu, lauxsae riunyumj yawj dwk gou, lumjbaenz naeuz: “Mwngz caen ndei, mwngz gig ak, lauxsae cihciz mwngz.”

Van, yo youq ndaw gujli bohmeh. Hagdangz dou yaek gawjbanh it bi it baez yisuzcez yienjok, banban cungj cinjbi ndei lo, biujyienj yaek hainduj lo, daxboh daxmeh hix daeuj lo, ndawsim gou youh gikdoengh youh lau. Gikdoengh haenx dwg daxboh daxmeh gingqyienz daeuj yawj gou biujyienj lo, lau haenx dwg saeklaeuq gou lumz dungcoz le baenzlawz guh? Aiq hawj ban dou caeuq bohmeh vutnaj bw. Mwh hwnj daiz biujyienj, aenvih gou gaenjcieng lai, caen lumz dungcoz lo, gyoengqvunz laj daiz cungj riuhaha. Ma daengz ranz, daxboh daxmeh nai gou naeuz: “Gyauh ha, gaej siengsim, daxboh daxmeh roxnyinh mwngz diuq ndaej gig ndei, cijaeu mwngz baezlaeng gaej faensim, couh itdingh diuq ndaej engq ndei.”

Van, lij yo youq ndaw gvansim doengzhag. Baezde gou baenz bingh lo, bae yihyen genjcaz, canghyw naeuz mbouj youqgaenj law. Gou bonjlaiz siengj cingjgyaj youq ranz yietnaiq, hoeng youh lau nguh hagsib, ndigah cijndei daiq bingh bae hagdangz. Mwh hwnjdangz, gou ae mbouj dingz, baez ae, gyoengq doengzhag cungj yawj gou. Gou sim gig mbouj onj caj roengzdangz, it faen cung, song faen cung, sam faen cung…… seiqcib faen cung gvaqbae lo, cungjsuenq roengzdangz lo. Gyoengq doengzhag cungj humx youq diegnaengh gou, lumj cingq caj gijmaz nei. Gou nyaenx mbouj youq youh ae sing ndeu, gyoengq doengzhag byaengq lwgda naeuz: “Mwngz baenzlawz la? Dwg mbouj dwg bingh lo? Naek mbouj naek? Yaek lwnh mbouj lwnh lauxsae? Yaek bae yihyen yawj lwi?” “Gou…… gou bingh lo. Sou cuengqsim, mbouj cienz hawj sou law, gou rox haeujsim di.” “Mbouj dwg law, mwngz lijgaij loeng dou lo, dou cij dwg gvansim mwngz.”

Ndaw gwndaenj miz haemz, hoeng engq lai dwg van, mizseiz yo youq ndaw biujyangz lauxsae, mizseiz yo youq ndaw gujli bohmeh, mizseiz yo youq ndaw gvansim doengzhag, cijaeu raeuz yunghsim cimz, itdingh cimz daengz gij vandiemz ndaw gwndaenj.

(Huznanz Swngj Sauyangz Si Lungzveiz Yen Luzduhcai Cin Cunghsinh Siujyoz Roek nienzgaep Liuz Dwngzgyauh)