Moix boux vunz gij roxnyinh de cungj mbouj doxdoengz, miz mbangj vunz roxnyinh bae hagdangz caen ndei, miz mbangj vunz roxnyinh dang ranzcawj caen ndei, lij miz mbangj vunz roxnyinh swyouz caen ndei. Youq ndawsim gou, roxnyinh ma ranz ceiq ndei.

Moix baez gou ma daengz ranz, cungj feihcij ndeu coemj haeuj naj daeuj, laxlawz dwg daegnuengx gvaq- daeuj caeuq gou guh’unj, heuh gou umj de, mwhde gou roxnyinh angq dangqmaz.

Moix baez gou ma daengz ranz, daxbuz cungj gvansim gou: “Ngoenzneix baehag baeg lwi? Gwn mbouj gwn mak? Yiet mbouj yietnaiq?” Mwhde gou roxnyinh raeuj dangqmaz.

Moix baez gou ma daengz ranz, daxboh cungj youq henz rwz raeb gou: “Daehsaw naek lwi? Vaiq di cuengq roengzdaeuj ba. Ngoenzneix youq hag- dangz baenzlawz yiengh, miz mbouj miz saeh simnyap?” Mwhde gou roxnyinh vuenyungz dangqmaz.

Moix baez gou ma daengz ranz, daxmeh cungj dwg yaengyaeng lumh gyaeuj gou cam: “Ngoenzneix cozyez lai lwi? Aeu mbouj aeu caeux di yietnaiq?” Mwhde gou roxnyinh daxmeh ndiep gou dangqmaz.

Moix baez gou ma ranz miz di simnyap, daegnuengx couh hemqvava, fouxfafa daeuq gou riu. Mwhde gou roxnyinh mizyinx dangqmaz.

Yienznaeuz moix baez ma daengz ranz cungj baeg lo, lij yaek sij cozyez, lienh ganghginz…… Hoeng siengj daengz ndaej raen daengz vunz ceiq caen, youq gij raeujrub、mizyinx buenx gou caeuq gujli lajde, gou couh rengzrwdrwd lo!

(Gvangjdungh Swngj Sinhcin Si Gvanghmingz Sinhgih Gvanghmingz Siujyoz Vangz Hwzcenz)