Gou bineix gaenq hwnj sam nienzgaep lo. Youq ndaw hagdangz, moix yiengh goenggoq gou cungj gig ndei, youq ndaw ranz gou hix siengj yienghyiengh saeh cungj swhgeij gag guh.

Gyanghaet, gou ngamq hwnqdaeuj, daxmeh couh gvaqdaeuj bang gou daenj buhvaq. Gou ganjgip bibi fwngz, naeuz: “Meh, saehcingz gou gou gag guh, mwngz mbouj yungh caiq bang gou daenj buhvaq lo!” Daxmeh naeuz:“Mwngz seizneix cujyau yinvu couh dwg hagsib, doenghgij saeh neix mwngz mbouj yungh guh!” Gou naeuz: “Meh, roeglwg ndaej aeu hag rox gag mbin, danghnaeuz daxmeh cungj itcig henhoh de ne, de couh ciengxlwenx mbouj rox mbin! Gvaqlaeng gou gag daenj buhvaq、daenj haiz、roi gyaeuj、swiq naj ba!” Daxmeh angq dwk naeuz:“Lwg gou cungjsuenq majhung lo!” Dingqnyi daxmeh gangj gij vah neix, sim gou lumj ndaej gwn dangz nei diemzsubsub.

Banhaemh, gou sij sat cozyez le, gag naemj: Daxboh ngoengznaengz guhhong baenzneix naet, mbatlaeng cozyez gou couh gag genjcaz ba, gaej hawj daxboh sinhoj lo. Gou dawz cozyez nyinhcaen genjcaz hwnjdaeuj, dawz giz loek baez giz baez giz gaijcingq. Daxboh naiqnuknuk ma daengz ranz le, ciuq- yiengh dawz cozyez daeuj genjcaz, caen hawj gou gamjdoengh ha! Gou ganjgip buet gvaq- bae, bibi fwngz naeuz: “Boh, coz- yez ngoenzneix gou gag genjcaz lo, baezlaeng saehcingz gou hawj gou gag guh ba, mwngz ngoenznaengz cungj baenzneix sinhoj, wnggai ndeindei yietnaiq.” Daxboh yawjyawj gou, ndawsim diemzsi riu naeuz: “Lwg gou cungjsuenq majhung lo, rox gvansim ciuqgoq bouxlaux lo!”

Yaek ninz lo, yahdaiq youj bat raemxndat he byaij coh gou naeuz: “Daeuj, yahdaiq bang mwngz swiq din lo!” Gou ganjgip buet gvaqbae, ciep gvaq bat raemx ndaw fwngz yahdaiq, naeuz: “Daiq, baezlaeng saehcingz gou gou gag guh, mbouj yungh mwngz bang gou lo! Baezlaeng gou daeuj bang mwngz swiq din ba!” Yahdaiq dingq gou gangj le, lwgda riu ndaej laep baenz diuz sej ndeu. De lumh aen gyaeuj gou naeuz: “Caen dwg lwg gvaigvet ha!”

Menhmenh dwk, gou hag rox le saehcingz swhgeij swhgeij gag guh.

(sam nienzgaep Vuz Mingz)