“Dinglingling——” Raq sing lingz dienhvah coeg rwz ndeu cauz ndiu loq ndaw gyanghaet gou. Gou nunu lwgda, henz rwz cienz daeuj sing sug daxgoeng: “Lan ha, bineix maenz ndaw ranz ndaem haenx ndaej sou lo, mwngz ceiq gyaez gwn lo……” Daxgoeng youq dienhvah mbiengjde gangj mbouj dingz. “Mbouj law, cozyez gou caengz sij sat, caj singhgiz laj ba.” Gou sing hung naeuz. Gvaq geij ngoenz le, sing lingz haenx youh youq henz rwz gou yiengj hwnj. Lij caengz caj gou hai bak, daxgoeng couh caeuq gou ienq naeuz: “Ai, lan ha, mwngz itcig mbouj ma, gou louz di maenz hung caengz sou, siengj louz hawj mwngz gwn, mbouj liuh daengz deng vunz caeg bae lo.” Vah daxgoeng gig hojsik caeuq fouznaih, gou cix mbouj naihfanz lo: “Goeng ha, mwngz baezlaeng gaej vih cungj saeh neix dwk dienhvah daeuj lo, gou cingq nyaengq sij cozyez ne!” Sing ienq daxgoeng fwt dingz lo. Haujlai nanz, de cij gangj: “Ndei ba.”

Seizgan gvaq bae haujlai nanz. Miz ngoenz ndeu cuengqhag ma ranz, gou sou daengz daxgoeng geiq daeuj daeh maenz caeuq fung saenq ndeu. Hai aen daeh, heiq namh singjsien coemj haeuj ndaeng daeuj, cungj feih neix haemq nanz mbouj mup daengz lo, gingqyienz miz cungj roxnyinh caenciet haujlai nanz mbouj gamjsouh daengz haenx. Caiq yawj daeh maenz, moix aen hung iq ca mbouj lai doxdoengz, vanzlij uet ndaej seuqsag dem. Gou caj mbouj gib hai fung saenq yawj, ndaw saenq dax- goeng sij naeuz:“Lan ha, mwngz haujlai nanz mbouj ma lo, maenz dengz cumx did ngaz lo, gou genj gij ceiq ndei hawj mwngz, aenvih goeng rox mwngz ceiq gyaez gwnz maenz. Lan gvai, gou rox mwngz hagsib nyaengq, hoeng miz seizgan ma yawjyawj, goeng siengj mwngz lai lo……” Saenq doeg daengz neix, ndaeng gou manh lo. Gou lumj yawjraen daxgoeng aeu song fwngz cozcat de uet aen maenz, gwnz naj ndaemndwt miz gij vuenyungz caeuq rimhoz riu dwk, de sijsaeq uet moix di namh gwnz maenz, moix di uq gwnz maenz. Seizde ndaw da gou cungj dwg raemxda, ndaw mumjgyumq, feihhom lwgmaenz buenx dwk gij feih gyaez iemq haeuj ndawsim gou.

“Boh, ngoenzsinghgiz raeuz bae yawj daxgoeng ba!” Daxboh riu dwk ngaekngaek gyaeuj, de lumj rox gij sim’eiq gou nei.

Gij gyaez ndaw maenz daxgoeng, yuk ndiu gij caencingz ninzndaek haemq nanz gou. Ndaw gwndaenj, raeuz mboujduenh bae ra vuenyungz, gizsaed vuenyungz couh youq henz ndang raeuz.

(Gyanghsuh Swngj Suhcouh Si Mozcwngz Cunghsinh Siujyoz roek nienzgaep Liuz Mung- yingz)