Bi’gvaq mwh muengzcungq, gou youq ndaw naz ndaem haeux, yaepyet couh daengz seizcou lo, geiqciet ndaejsou daengz lo. Seizcou ngoenz ndeu, gou caeuq daxboh daxmeh caez daeuj ndaw naz gvej haeux.

Gou angqvauvau buet bae coh doenghnaz, yawj baihnaj, dwg benq haij henjgim ndeu. Rumz ci gvaqdaeuj, langhhaeux fubfab, rienghaeux henjrwg- rwg riu ndaej ndang gungj lo, henz rwz cienz daeuj sing yiengjsasa, lumjdwg danz diuz go demsou nei.

Gou gyaeuj daenj mauhdemx, fwngz gaem fagliemz, deq mbouj gib roengz naz bae. Gou gungj ndang roengzdaeuj, fwngz swix gaem cungqgyang gohaeux, fagliemz fwngz gvaz dep goek haeux, yungh rengz gvej coh baihlaeng, gaem haeux ndeu couh gvej roengzdaeuj lo……

Mbouj yaep ndeu, buh gou deng hanh iemq dumz lo, hoeng yawj henz din doi hwnj baenz bog baenz bog haeux, gou ndawsim cungj dwg angqvauvau. Baenz naed baenz naed haeux fagfwdfwd, lumj baenz naed baenz naed gim henjrwgrwg nei, youq laj daengngoenz ciuq, yienhndaej daegbied lwenqda.

“Gvak rum daengz banringz, ndik hanh ringx roengz namh. Byawz rox ngaiz ndaw vanj, naednaed hanh giet baenz.” Gou caencingq roxriuj haeuxgwn ndaej daeuj mbouj yungzheih lo.

(Gyanghsuh Suhcouh Si Fanghcouh Siujyoz ngeih nienzgaep Hangz Yigaij)