Miz vunz gyaez gofaex sangvid, miz vunz gyaez vameizgveiq gak saek gak yiengh, miz vunz gyaez vamauxdan fouqgviq gyaeundei, hoeng gou cix gyaez nywjfuemx mbouj hwnj da haenx.

Mbaw nywjfuemx yiengh luenzgyaeq gig dwggyaez, ngamq yawj caeuq mbaw bingzciengz mbouj miz maz mbouj doengz, hoeng mwh mwngz byaij gyawj de, couh raen mbaw de dwg miz haujlai mbaw iq gyoebbaenz, moix mbaw iq lumj swbingh baizdoih nei cingjcaez baizlied dwk, sijsaeq yawj gaenj gwnz mbaw lij maj miz oen iq yungzyub mbouj yinx vunz haeujsim haenx.

Nywjfuemx giz ceiq daegbied couh dwg mbaw de rox doengh, mwh fwngz raeuz baez bungq de, nywjfuemx couh lumj dah niq launyaenq nei, gaenjmbaw sikhaek duiq roengz, mbaw iq gyoeb youq doxcaez. Engq saenzgeiz haenx dwg mwh mbaw iq gyoeb hwnjdaeuj lij miz gvilwd ne! Couh lumj vujdauj “guenyaem cien fwngz” nei daj baihnaj cug mbaw cug mbaw gyoeb coh baihlaeng, mizseiz mwngz bungq deng gizlawz, de couh gyoeb daengz gizde, lij rox gungj ndang roengz, mizyinx lai lo!

Vihmaz dwg yienghneix ne?

Daiq gij geizheih neix, gou caeuq daxboh caez bae caz swhliu, laxlawx mbaw nywjfuemx goek gaenjmbaw, miz haujlai raemx- sibauh, mwh deng baihrog gik, raemxsibauh goek gaenjmbaw couh baizok daengz geh sibauh bae, yienghneix couh sawj mbaw de gyoebhwnj, vanzlij de gyoebhwnj geij faen cung le youh gag hoizfuk yiengh gaeuq lo!

Nywjfuemx caen mizyinx lai lo!

(sam nienzgaep Seh Hanzyij)