Gyoengq doengzhag, gwnz seiqgyaiq miz cungj doxgaiq geiz- miuq ndeu, yawj mbouj raen, lumh mbouj daengz, hoeng de itcig buenx raeuz, hix buenx daxboh daxmeh raeuz, buenx daxboh daxboh raeuz、daxmeh daxmeh raeuz…… De doiq bouxlawz cungj goengbingz, miz vunz insik de, hix miz vunz saisaengq de. Lauxsae yaek gangj haenx dwg—— seizgan. Ngoenzneix, raeuz daeuj hoedheux seizgan, gangjgangj sou doiq seizgan miz maz gamjsouh、rox de geijlai, ndei lwi?

“Seizgan couh dwg aencung mbouj dingz roq dikdak, couh dwg soq gwnz soujbiuj gaca gaca diuq. de ngauz gyaeuj bi rieng guhcaemz dwk.” Dungh- dungh diuqbeiz aeu seizgan gangj daej doenghyaegyaeg.

“Seizgan couh dwg daxgoeng daengngoenz gyanghaet naj ndingyanyan youq baihdoeng vadfwngz coh raeuz, banhaemh youh naj ndingfodfod youq baihsae vadfwngz coh raeuz.” Canghfwen iq Gwzgwz cungj dwg biujyienh ok gij simsingq canghfwen de.

“Seizgan couh dwg dingling- ling, hwnjdangz lo. Raeuz huhaha nyoengx haeuj ndaw gyausiz daeuj; dinglingling, roengzdangz lo, raeuz youh huhaha buet ok gyausiz bae.”

“Mwh gou daej, seizgan riengz raemxda lae bae lo; mwh gou riu, seizgan youq ndaw singriu mbin hwnj gwnzmbwn bae lo.”

“Seizgan couh dwg gyaeuj- ndoq daxboh、byoemhau dax- goeng、 nyaeuq daxbuz.”

“Seizgan couh dwg gofaex hai va lo, gomak dawz aen lo, mbaw faex loenq lo; seizgan couh dwg nae doek lo, doi vunznae lo.”

“Mwh gou ciengqgo, seizgan hix caez ngon; mwh gou diuqfoux, seizgan hix caez daemh din; mwh gou ngaez, seizgan hix ngaez. Seizgan dwg baengzyoux duz- ngaeuz raeuz.”

Gyoengq doengzhag, seizgan yawj hwnjbae gig lai, gizsaed doiq raeuz moix boux siuj baengzyoux daeuj gangj, moix ngoenz cij miz ngeihcib seiq diemj cung, ndonjdeuz bae faen cung ndeu couh noix faen cung ndeu, ndonjdeuz bae diemj cung ndeu couh noix diemj cungj ndeu. Yienghneix ne, raeuz doegsaw ha, ciengqgo ha, diuqfoux ha, couh noix faen cung ndeu、noix diemj cungj ndeu lo! Ndigah, fwngz iq raeuz yaek dawz seizgan gaem- ndaet, gaej hawj de youq mwh daej ha、nauh ha、ngaez ha ndonjdeuz bae bw.

(Vangz Daci)

Seizgan